Шукерте огыл чодырам йӧрыктышӧ-влакын профессиональный мастарлыкыштым тергыме республик кӱкшытан конкрусышт лийын.
Тудым Марий Элын Пӱртӱс поянлык, экологий да йырым-йырысе средам аралыме шотышто министерствыже Юл кундем технолгический кугыжаныш университет, Йошкар-Ола администраций, тыгак «Husqvarna» ден «STIHL» фирме-влакын полшымышт дене эртарен. Чодырам йӧрыктышӧ-шамыч ончыч университетын тунемме-опытный лесхозшын Нолькысо лесничествышкыже чумыргеныт. Тушто нуно пашам ыштен моштымыштым ончыктеныт гын, варажым моло мастарлыкым Йошкар-Оласе Ленин лӱмеш площадьыште тергеныт. Мутлан, кузе бензопилаште чепым вашталташ, пушеҥге кушым руаш, сорымым пӱчкедаш да молымат. Участник-влакын кажне упраженийыштым судейский коллегий Чодырам руышо-влак коклаште чемпионатлан тӱнямбал ассоциацийыштын пеҥгыдемдыме правилышт дене келшышын аклен.
Конкурсын вич кужытыштыжат универститетын тунемме-опытный лесхозшын пашаеҥже Андрей Кренев ойыртемалтын. Тудлан пӱртӱс поянлык, экологий да йырым-йырысе средам аралыме шотышто министр Константин Наговицын диплом дене пырля спонсор-влакын ойырымо пӧлекыштым кучыктен. А тидыже «Husqvarna» ден «STIHL» бензопила-влак лийыныт. Кокымшо ден кумшо верыш Чуваш Республик гыч Галина Житова ден ты лесхоз гычак Сергей Иванов лектыныт. Нунымат спонсор-влак пӧлек дене куандареныт. Каласен кодыман, Чуваший деч посна эше Угарман кундем гычат участник-влак лийыныт.
С.Носова.
Снимкыште: конкурс годым.