Чодыра да сонар-озланлык министерствын специалистше-влакын шотлен лукмышт почеш, Курыкмарий районысо «Емешевский» пӱртус заказникыште кодшо ийын 384 сурок илен.
1993 ийыште 50 вуй ты янлыкым Татарстан Республик гыч кондымо да «Почисти» урочищын курыкан-кореман верышкыже илаш колтымо. 50 вуй гыч лужо узо да тынарак ава, молыжо самырык сурок лийыныт. 1996 ийыште тиде чот 12 вуйлан ешаралтын. Луктын колтымо изи янлык-влак сайын иланеныт. Варажым нуно вес верлашке куснаш тӱҥалыныт. Сурокын чотшым ешараш да илыме вержым кугемдаш манын, 1994 ийыште тушто лӱмын заказникым ыштыме. Тудын кумдыкшо 5,8 гектарыш шарлен да Юл эҥерын пурла могырыштыжо, Сумка ден Кугу Юҥга эҥерла коклаште вераҥын.
Курык вуй ден коремлаште куэ, писте, нӧлпӧ, арама кушкыт. Олык, пасу шуко, тидат суроклан сайын иланаш йоным ыштен.
С.Носова.
У черке, у шӱлыш
Советский посёлкышто Российыште волгалтше чыла святой-влакын черкышт чоҥалтеш.
Тачысе кечылан калыкын чумырымо окса дене кермычым, ошмам, моло чоҥымо моло материалым налыныт. Советский ПМК-ан пашаенже-влак цоколь пачашым нӧлтен шуктеныт, манаш лиеш. Тений черкын кассышкыже 80 наре тӱжем теҥге пурен. Тӱҥ шотышто — тиде юмылан ӱшаныше-влакын надырышт. Оксам пуаш кумылан-влак тудым черкын банкысе счетышкыжо колтен, тыгак туштак лавкыш конден кертыт.
С.Носова.
Ий шӱштырга, колызым ондала…
Эртыше кечылаште Волжский районышто, Юл эҥерын заливыштыже, «Волгарь» дачный комплекс воктене вӱд йымаке 69 ияш колызо пурен каен.
Марий аварийно-утарыше службын специалистше-влакын толын шумешкышт, тудо шкежак ий ӱмбаке лектын кертын. Но эмлымверыш садак наҥгаеныт, кеч тушан кодаш тореш лийын.
Вес туткар Курыкмарий районысо Рутка эҥерыште лийын. Ныл шагат кастене утарыше службыш йыҥгыртеныт да полышым йодыныт. Кум пӧръеҥ ий ӱмбаке кол кучаш лектыныт. Иктыже вӱдыш волен каен. Вес коктыжо полшаш тӧченыт гынат, утарен кертын огытыл. Утарыше-влакын толын шумешке, тудо вӱд йымалне йомын. Колышо пӧръеҥ Йошкар-Ола гыч лийын.
С.Носова.
