Кушкыжмын кастене Волжск олаште кӱдырчан йӱран тӱтан мардеж эртен. Тидлан кӧра тушто илыше-влаклан изижак огыл эҥгек ышталтын. Сандене вӱргечын регион вуйлатыше А.Евстифеев республикысе чрезвычайный ситуаций шотышто комиссий дене пырля тушко шкежак миен коштын.
Александр Евстифеев ончыч Тыныслык уремысе 19-ше №-ан пӧрт деке ончыч миен. Лач тудлан эн кугу эҥгек ышталтын, леведедышыже чотак локтылалтын. Кӱшыл пачашысе кум пачер оза-влак кугу туткарыш логалыныт. Сандене ола администраций нунылан вигак жаплан леведышым келыштараш йӧным муын. Леведышыжым капитально вес ийын олмыктышаш улыт улмаш. Ынде ты пашам тенияк шуктат.
Волжскыш мийымыж годым А.Евстифеев ола администрацийыште оперативный совещанийым эртарен. Тушто тӱтан деч ышталтше эҥгек шотышто мутланеныт да мом ыштышашым палемденыт. Чылаже вич пӧрт локтылалтын. Тушто илыше-шамычлан лишыл жапыште пачерыштым олмыкташ полшышаш улыт. Йӧралтше пушеҥге-влакымат управляющий компаний-влак шке вийышт дене кораҥдат. Эшежым тӱтанлан кӧра электроснабжений дене кылдалтше 10 объектлан эҥгек ышталтын. Но электросетевой компанийын пашаеҥже-влак аварийым пеш писын кораҥденыт да тулым пуэныт. Йӧралтше пушеҥге-влак корнысо транспортланат жаплан шогалаш амалым ыштеныт. Тӱтан мардеж дене кылдалтше эҥгекым кораҥдыме пашам арня жапыште шуктышаш улыт. Ты пашалан регионысо бюджет гычат шийвундо ойыралтеш. Тидын годым А.Евстифеев управляющий компаний ден озаланыше субьект-влак деч оксам аныклен кучылташ йодын.
Тыгак Волжскышто канализационный коллекторым олмыкташ республикысе правительствын резерв фондшо гыч 16,7 миллион теҥгем ойырат. Олаште лиймыж годым регион вуйлатыше тудым шкак ончен лектын да омыктымо графикым палемдыме шотышто ответственный еҥ-влак дене мутланен. Коллекторышто аварий тений шошым лийын. Эше 1980 ийыштак ыштыме 300 метр кужытан пуч ныл микрорайоным обслуживатла. Кызыт тушко жаплан насос станцийым келыштарыме. Лишыл жапыште 182 метржым вашталтыман. Санденак правительствыште тидлан оксам ойыраш палемденыт. Олмыктымо пашам эртараш проект-смете документацийымат ямдылыме. Тӱрыс пашаже 39 миллионыш шуэш. Тений аварийыш логалше кужытышым олмыктат гын, вес ийын — кодшо ужашыжым.
Марий Эл Республикым вуйлатышын Организаций-аналитике
виктемжын уверже негызеш С.Носова ямдылен.
