УВЕР ЙОГЫН

У микроавтобус деч сравоч – кидыште!

Кодшо кечылаште Республикысе курчак театр ден Марий самырык театр у автобусан лийыныт.

Нуным налаш «Театр-влак – йоча-шамычлан» программе йӧным ыштен. Федерал бюджет гыч пурышо субсидий йоча ден курчак театрлаште усталык пашам вияҥден колташ да техникым уэмдаш полша. Пытартыш кум ий жапыште тыгай программе почеш Марий Эллан 23,3 миллион теҥге ойыралтын.

Регион вуйлатыше Александр Евстифеев артист-влакым саламлен да у автобус деч сравочым лачак тений кучыкташ моткоч куанле манын, вет  Россий Президентын увертарымыж почеш 2019 ий Театр идалыклан шотлалтеш.

У микроавтобус артист-влаклан гастрольыш лекташ, тӱрлӧ фестиваль ден конкурсыш миен толаш, республикнан рӱдолаж деч тораште илыше калык дене вашлиймашке лектын кошташ моткоч кӱлешан. Автобус чыла шотыштат йӧнан: кондиционер, коҥга улыт.

– Моткоч кугу таум ойлымо шуэш республик вуйлатыше Александр Александровичлан да Марий Эл правительствылан мыланна поснак пытартыш жапыште полшен шогымыштлан. Ындыжым ме, мутат уке, ончышына-влак деке эшеат лишкырак лийына, – вашлиймашке толшо-влакын лӱмышт дене тауштен каласен Республикысе курчак театрын художественный вуйлатышыже Алексей Ямаев.

«Театр-влак – йоча-шамычлан» программе полшымо дене Курчак театр ныл у спектакльым («Цветик-семицветик», Снежная королева», «Йӱд орол», «О рыбаке. Упражнения. Этюды. Сцены») сценыш луктын, йӱк да тул (волгалтарыше) оборудований-влакым жаплан келшышым налын.

А Марий самырык театр «Аленький цветочек» мюзиклым, «Недоросль» спектакльым калыклан ончаш темлен да эше кок у постановкым шындаш палемден: «Ася» ден «Прохождения Горюхина». Тиддеч посна ты театрат йӱк да тул оборудованийым да пушкыдо 230 креслым налын. 

А.Байкова

Д.Речкинын фотожо

Опубликовать в Одноклассники

Добавить комментарий