СПОРТ УВЕР ЙОГЫН

Тендан сеҥымашда – калыкнан кугешнымашыже

Инвалид-влакын III всероссийский кеҥеж спартакидышт марте шуко кечат кодын огыл. Тудо 12 гыч 20 июль марте Йошкар-Олаште эрта.

9 июльышто республик вуйлатыше Александр Евстифеев  Марий Эл правительствыште мероприятийын оргкомитетшым чумырен. Тушто спартакиадылан ямде улмо шотышто каҥашыме.

Спорт сооружений-влак спартакиадылан ямде улыт. Таҥасымаш-влак «Дружба» стадионышто, тусо Теннис кортышто, Вӱд спорт полатыште да «Марий Эл» ий полатыште эртат.

Участник-влаклан МарГУ-н, стоительный техникумын столовыйышкышт да «Спортивный остров» кафеш кочкыш йӧрварым ситышын конденыт. Спорт объектлашке кӱлешан мебельым, оргтехникым да молымат вераҥденыт.

 

***

10 июльышто регион вуйлатыше Александр Евстифеев Инвалид-влакын III всероссийский кеҥеж спартакидыштын участникше-влак дене вашлийын.

Правительстве пӧртыштӧ – куштылго атлетике, иймаш, дзюдо да ӱстембал теннис дене кылым кучышо самырык спортсмен-шамыч лийыныт. Мемнан-влак спортын лач нине видыштыже таҥасаш тӱҥалыт.

Вашлиймаште молодёжный политике, спорт да туризм министр Лидия Батюкова Марий Элын сборный командыж дене палымым ыштыш. Командыште Йошкар-Ола, Советский, Морко, Медведево да Кужэҥер районла гыч ӱдыр-рвезе-влак улыт. Чылаже 23 рвезе да 14 ӱдыр федерал кӱкшытыштӧ наградым налшаш верч таҥасаш да марий кундемын чапшым аралаш тӱҥалыт.

– Шочмо мландынан лӱмжӧ дене федерал кӱкшытан таҥасымаште лияш – тиде кугу чап да кугу ответственность. Тендан сеҥымашдам республикыште илыше чумыр калыкын кугешнымашыжлан да национальный поянлыкшылан шотлаш лиеш, – ойлен Александр Евстифеев.

Марий Элыште спортын адаптивный видшым вияҥдымашлан кугу тӱткыш ойыралтеш. Тӱрлӧ функциян инфраструктур улмылан кӧра физический культур да спорт дене кылым кучышо-влак ий гыч ийыш ешаралтыт. Тидын нерген регион вуйлатышат палемден.

– Мемнан самырык, но тыгодымак кугу ӱшаным шочыктышо команде. Сай результатым ончыкташ манын, те чот тыршаш тӱҥалыда манын ӱшанем. Мый палем, Те тидым ыштен кертыда. Спартакиаде илышыштыда волгыдо шарнымашым кужу жаплан кода веле огыл, тиде жапыште те Российын тӱрлӧ кундемже гыч толшо-влак дене палыме лийыда, йолташым муыда манын, ӱшанен кодам. Тыланда сеҥымашым тыланем!  – республикын сборный командыжлан поро тыланымашыже лие Александр Евстифеевын.

Республик вуйлатыше деке спортсмен-влак Спартакиадылан лӱмынак ямдылыме чапле формыштым чиен толыныт. Тидын гоч меат нунын кугу таҥасымашлан ямде улмыштым ужна. Делегаций вуйлатыше Кирилл Печенинын регион вуйлатышылан поро тыланымашым ойлымыжлан тауштен да палемден:

– Мемнан спортсмен-влак кугу спорт мероприятийлан ямде улыт, нуно лач «шӧртньӧ» верч таҥасаш тӱҥалыт.

Вашлиймаш мучаште Марий Элын сборный командыже регион вуйлатыше дене пырля шогалын, шарнымаш фотом ыштен. А тиде сай йӱла, тудо спартакиадыште сеҥымашке шуаш полша.

Алевтина Байкова

Д.Речкинын фотожо

Опубликовать в Одноклассники

Добавить комментарий