Еш, Йӧратымаш да ӱшанле улмо кечын Йошкар-Олаште Подольский курсант-влак уремыште чолга да тале еҥ-шамычын тыршымыштлан кӧра «Кудывече кечым» эртареныт.
Тӱрлӧ конкурс, модыш дене эртыше ты весела мероприятийыш йочасадысе, лишыл уремлаште илыше йоча-шамыч веле огыл, пошкудо, уна шагал огыл чумыргеныт.
Пайрем годымак 10-шо ден 80-ше №-ан йочасадысе йоча-влак икте-весышт дене таҥасеныт. Поро паша аллейыште тӱрлӧ сынан таҥасымаш, модыш деч вара гыч йоча-влак концертым ончыктеныт.
Пайремыште эн чулымым, веселам аклыше жюриште Марий машиносторительный заводын тӱҥ энергетикше Андрей Бахматов лийын. Мемнан регонышто ик эн ончыл предприятий гыч толшо ӱшанъеҥ тыгай пайремын социальный кӱлешлыкшым палемден. «Кудывече кече» гай мероприятийыште пошкудо-шамычын икте-весе дене эшеат лишке палыме лияш, илыме пӧрт кудывечыште вашлийын кутырымо йӱлалан эркын-эркын илышыш шыҥдаралташ сай йӧн лектеш манын ойлен.
Поро тӱҥалтышан пайремыш Европын да тӱнян чемпионжо, рӱдолаште эртарыме моло оҥай акцийыш ушнаш полшышо, спортым, таза илыш-йӱлам жаплыше пауэрлифтер Дмитрий Ивановат лийын.
Пайремын ик организаторжо, 80-ше №-ан йочасадын вуйлатышыже Вера Вертинскаят шке шонымыжым ойлен:
– «Кудывече кече» – ача-ава, икшыве, йочасад пашаеҥ-шамычлан моткоч пайдале, кӱлешан еш мероприятий. Тыгайыште кугыеҥ-влакат шкеныштым ик жаплан йоча семын шижын кертыныт. А медаль-шамычым кучыктымаш – шукыштлан ик эн пиалан тат семын шарналт кодеш», – палемден тудо.
Вес чолга организатор – 20-шо №-ан йочасадым вуйлатыше Галина Канашина. Тудо весела койышыжо, тӱрлӧ модышым эртарымыж дене йоча, ача-ава-шамычым воштылаш, модаш, таҥасаш тарватен.
Ушештарена, кеҥеж мучко Йошкар-Олаште тыгак «Кеҥежым! Пырля! Уло кудывече дене!» проект пашам ышта. Каныш пагытлан олаште кодшо йоча-шамычлан модыш, спорт, таҥасымаш сынан оҥай мероприятий-влакым паша кечынак эше ятыр вере эртараш палемдыме.
Р.Чепакова.
Администраций сайт гыч налме фото-влак.
