«Марий Элын поликультурный картше» проект почеш 4 июльышто Благовещений башньыште Звенигово ола да Звенигово районлан пӧлеклалтше выставке почылтын.
Тушко Республикын тӱвыра, печать да калык-влакын пашашт шотышто министр Константин Иванов, Звенигово ола администраций вуйлатыше Татьяна Цыганова, Звенигово район администраций вуйлатыше Наталья Козлова да ты кундемыште шочын-кушшо-влак ятырын погыненыт.
— Республикнан 100 ияш лӱмгечыж вашеш тиде кумдыкышто кажне район шкеж дене палдарен шуктышаш, ойла Константин Анатольевич. — Звенигово моткоч мотор верыште, кумда Юл эҥер, пасу да олык воктене, верланен. Производство могырым ончымаштат районышто кугу паша шукталтеш.
Звенигово районышто ятыр предприятий, завод уло, ялозанлык паша лектышат куандарыше. Ты кундем кидпашам йӧратыше, калыкшын тӱвыражым палыше да аклыше, тукым гыч тукымыш шуйышо калыкше дене куандара. Тидыжым выставкыште сылне марий тӱран тӱрлӧ вургемым, пӱртӱс кушкыл гыч ыштыме арверым ончен каласаш лиеш.
Звенигово — кум рӱдыверын спутникше. Йошкар-Ола, Казань да Чебоксар ола-влакын вӱд, кӱртньыгорно, автомашина корныжо-влак Звенигово гоч эртат.
Провой вел марий профессионал музыкальный культурлан негызым пыштыше землякышт Иван Палантай, Яков Эшпай денат кугешна. Тыгак лач тиде кундемыште икымше марий сӱретче ӱдырамаш Елизавета Атлашкина, Марий Элын сулло сӱретчыже Георгий Тайгильдин, тыгак ятыр писатель ден поэт, Совет Ушем Герой да молат шочын-кушкыныт, шке кундемыштым чапландарат.
Икманаш, Звенигово ола да район нерген кумданрак пален налаш шонышо-влаклан Благовещений башньыш миен толашак кӱлеш.
А.Байкова
Авторын фотожо
