УВЕР ЙОГЫН

Шотан ешыште илышыжат – пайрем гаяк

8 июль – Еш, Йӧратымаш да ӱшанле улмо кече. Но тудо шочмылан логалын, санденак республик кӱкшытан пайрем Йошкар-Олаште кугарнян эртыш. 

Мероприятий-влак ты кечын 10 шагат эрденак тӱҥалыч. Тиде жапыште Национальный президент искусство школышто «Компас прав ребенка: региональные практики и инициативы» конференций лие. Тушко тӱрлӧ министерстве, кугыжаныш, муниципал да верысе самоуправлений учреждений ден организацийла гыч еҥ-влак чумыргеныт ыле.  Конференций здравоохраненийыште, образованийыште, культурышто икшыве-шамычын праваштым аралыме дене кылдалтше пашам шуктышо специалист ден активист-влакын ты шотышто шинчымашыштым нӧлташ шонымаш дене эртаралтын.  

Марий Эл вуйлатыше Александр Евстифеевын лӱмжӧ дене погынышо-влакым республикын правительстве председательжын алмаштышыже Илга Дравниеце саламлыш.

Кечывал деч вара, 12 шагатат пелылан, Сеҥымаш бульварыште «Пиалан еш» памятник воктене Ешын ужар аллейжым почмо мероприятий тӱҥале. Тудлан негыз ӱмаштак ышталтын да икымше пушеҥгым лач тунам шынденыт. Тений кокымшо ваштарым Йошкар-Ола гыч кум шочшан Зотовмыт еш шындыш. Аллейлан кажне ийын молан лачшымак ваштарым ойырен налыт? Тудын лышташыже вич парням ушештара, тыгак тиде – вич тӱрлӧ шижмаш. Вес семын каласаш гын, ешын символжо. Санденак тений тудым эсогыл Казань гыч лӱмынак конденыт.

Тиде мероприятий жапыштак «Коляске-влак парад» лийшаш ыле. Но игечын чотак юалге улмыжлан кӧра тушко ушнаш кумылан-шамыч шагалын лийыныт. Улыжат 4 коляскым ыштен конденыт да 1 самокат дене толыныт ыле. Санденак ты мероприятийын тӱҥ организаторжын – Марий Элысе Деловой ӱдырамаш-влак ушем вуйлатыше Оксана Татаринован — мутшо почеш, «Коляске-влак парад» Олан кечышкыже, 10 августыш, кусаралтеш да тунам кумдан эрташ тӱҥалеш.

Пушеҥгым шындымеке, мыняр-гынат погынышо-влакым икшыве-шамычын мурен-куштен куандарымышт деч вара чыланат Патриарший площадьыш тарванышт. Тышкыже Набережный Брюггеште верланыше загс гыч еш-влак шествий дене тольыч да нуно иквереш ушнышт. А ты жаплан тиде кумдыкышто тӱрлӧ орагнизаций ден учреждений-шамыч мастер-классым эртараш, посна еҥ-шамыч кидпашаштым ончыкташ да налаш темлаш тӱҥалынытат ыле. Ӱмаште тиде пайрем кечын моткочак мотор игече шогыш да Патриарший площадь гӱжлен – тӱрлӧ услугым темлыше ден налаш кумылан, тыглай ончен коштшо-шамычат моткочак шукын лийыныт. А тений, манмыла, еҥ-влакым парня дене шотлаш лиеш ыле. Туге гынат толшо-шамыч кокла гыч  иктышт икшывыштлан прическым яра ыштыктышт, весышт висвис гыч вуйпидышым ышташ тунемыч, кумшыштын психологлан йодышым пуаш, нылымшыштын могай мужыр улмыштым, икте-всешытлан келшен толмыштым-укештым рашемдаш йӧнышт лийын. Тыгак йоча-шамычым оҥай модыш-шамыч дене модыктышт.

Ӱмашсе семынак теният мобильный комплекс машина шоген. Но еҥ-шамыч тудын пашам ыштымыж нерген ала пален огытыл, ала пурен лекташ кумылышт уке улмаш – мо-гынат мемнан тергалташ пурымына годым ик мужыр гына ыле. А вет тыште шке тазалык нерген моткочак кӱлешан уверым пален налаш йӧн пуалтын ыле: давленийым да вӱрыштӧ сакыр мыняр улмым висен, вигак каласышт. Мый гын тушеч такше куаныше лектым…

Пайремым 14 шагатат 30 минутлан Патриарший площадьыште торжественно почыч, кеч тиде 14 шагатланак лийшаш ыле.  Тушто эн ончычак «За любовь и верность» медаль дене палемдалтше еш-влакым саламлышт. Республикысе социальный вияҥмаш министр Ольга Федорован ойлымыж почеш, ты медальым Марий Элыште кажне ийын 70 ешлан кучыктат. Эше шукырак вате-марийымат палемдат ыле, но тиде – квото. Тылеч шуко огеш лий. А пайрем кечын Йошкар-Олаште 5 ешым саламлышт. Молыштлан республикысе районлаште ты пайремлан пӧлеклалтше мероприятийлаште кучыктеныт. Рӱдолаште палемдалтше еш-влак чыланат 25 ий деч шуко пырля иленыт. Рашрак каласаш гын, иктышт, мутлан, Волковмыт еш, 47 ий иквереш улыт, Игошинмыт ден Тимофеевмыт еш 51 ий ваш келшен, илышыштым шуят. Пайремыште кажныж нерген кӱчыкын палдарышт да медальым, пӧлекым, юмоҥам кучыктышт.

Тыгак «Идалыкын ешыже» всероссийский конкурсын регионысо этапыштыже сеҥыше-влакымат суапландарышт.

Россий Президент Владимир Путинын шукерте огыл лукмо пунчалже дене келшышын, тений Марий Эл гыч «Родительская слава» орден дене Шернур район Марисола гыч Шабдаровмыт еш палемдалтын. Нуно ик ӱдырышт деч молыжо чыланат – ача-ава ден кум ӱдыр ден кум йыгыр эрге – толыныт ыле. Шабдаровмытым сценыш ӱжыч гынат, … орденжым ышт кучыкто. Илга Дравниеце умылтарыш: республикышкына орден эше толын шуын огыл. Кузе колтат, туге ты ешлан кучыктат.

Но изирак умылыдымаш лийын кайыш гынат, тауштымо семын Шабдаровмыт сылне номерым ямдылен конденыт. Руш патыр-влак семын пуымо лӱман йыгыр-влак Алексей, Никита да Илья тугай чапле куштымашым ончыктышт – чыланат нуным куанен да кумыл нӧлтын ончымо! Арам огыл рвезе-шамыч куштымаш кружокыш коштыт.

Тиде кечын пайрем «Друзья» ВИА-н концертше дене мучашлалте.

Кугарнян игече йӱштырак ыле гынат, пайрем веселан да поро шӱлыш дене эртыш. Вес семынже лийынат кертын огыл дыр, вет кунам еш келшен ила, тушто йӧратымаш озалана, вате-марий икте-весыштлан  ӱшанле улыт, тунам илышыжат куанле – пайрем гаяк…

Любовь Камалетдинова

 

Авторын фотожо.

Опубликовать в Одноклассники

Добавить комментарий