УВЕР ЙОГЫН

Российын тӱрлӧ кундемже гыч унам вашлияш ямде улына!

Инвалид-влакын III всероссийский кеҥеж спартакидышт марте шуко кечат кодын огыл. Тудо 12 гыч 20 июль марте Йошкар-Олаште эрта.

Тидын шотышто кодшо арня мучаште Марий Эл правительствыште мероприятийын оргкомитетшын погынымашыже лийын. Спартакиадылан ямдылалтме да тудым эртарен колтымо шотышто мутланымашым республик вуйлатыше Александр Евстифеев вӱден.

— Спартакиадым федерал кӱкшытыштӧ эртарен колташ манын, ме чыла ыштена. Тудо чылалан кужу жаплан шарналт кодшаш, — палемден регион вуйлатыше. – Юл кундем федерал округышто Россий Президентын полномочный представительже Игорь Комаровлан ӱжмашым колтенна. Тудын паша графикше шыгыр гынат, таҥасымашым торжественно почмашке толеш манын ӱшанена.    

Молодежный политике, спорт да туризм министр Лидия Батюкован палемдымыж почеш, тачысе кечылан спорт сооруженийлаште ачалыме паша мучашлалтын. Кугу мероприятийлан кызыт Марий Элын сборный командыже кӱлынак ямдылалтеш. А туштыжо 39 спортсмен да 11 тренер шотлалтеш.     

Спартакиадын финал таҥасымашыштыже сокыр, соҥгыра, уш-акыл шотышто экшыкан, церебральный паралич черан да ошкылмо-тарванылме шотышто йӧсланыше-влак бочча, куштылго атлетике, ӱстембал теннис, иймаш, голбол, дзюдо, футбол дисциплинылаште чолгалыкым ончыктат.

— Спартакиадыште чылаже Российын 66 субъектше гыч 1945 еҥ ушнышаш. Нунын коклаште спортсмен, тренер да ужатен коштыктышо-влак улыт. Тушечын 88 еҥ (иктыже тренер) коляске полшымо дене куснылеш, 191 судья. Мероприятийыште 350 волонтёр пашам ышташ тӱҥалеш, — палемден Л.Батюкова. – Спартакиадын участникше-влаклан транспорт маршрутым ямдыленна. Нуным лӱмын келыштарыме автобус-влак шупшыкташ тӱҥалыт. 

Таҥасымаш-влак «Дружба» стадионышто, тусо Теннис кортышто, Вӱд спорт полатыште, физкультур да тазалыкым пеҥгыдемдыме «Спартак» комплексыште, «Марий Эл» ий полатыште эртат.

Кугу мероприятийжат лач ий полатыште торжественно почылтеш да туштак мучашлалтеш.

Спартакиадын участникше-влак (спортсмен, нуным ужатен коштыктышо да тренер-влак) МарГУ-н да ПГТУ-н тӱшкагудыштыжо илаш, а кочкашлан МарГУ-н, ПГТУ-н, строительный техникумын столовыйыштыжо, тыгак «Спортивный остров» кафеште кошкаш тӱҥалыт.

Погынымаште тазалыкым аралыме шотышто министр Мария Панькова медицине полышым пуымо шотышто каласкален. Спартакиаде жапыште врач-влак дежуритлаш тӱҥалыт.

Таҥасымаш деч посна кугу мероприятийыш чумыргышо-влакын яра жапыштым 18.00 гыч 20.00 шагат марте) марте веселан да пайдалын эртарыме нерген мутланеныт. Тидын шотышто тӱвыра, печать да калык-влакын пашашт шотышто министр Констанин Иванов тыгерак ойлен:

— Спартакидым почмылан да петырымылан пӧлеклалтше пайремлаште М.Шкетан лӱмеш Марий национальный, Константинов лӱмеш руш академический да Марий самырык театрын, «Марий Эл» кугыжаныш куштышо ансамбльын артистше, Палантай лӱмеш тӱвыра да сымыктыш колледжын студентше-влак, тыгак барабанщик, вокал студийын, бальный куштымаш, спорт федерацийын коллективше-влак мастарлыкым ончыктат. Чылаже тӱжем наре еҥ лийшаш.

Репетицийышт кызыт «Юбилейный» спорткомплексыште эртат, а 11 июль гыч Ий полатыш ямдылалташ куснат.

— Спартакиадыш толшо-влаклан Йошкар-Ола мучко экскурсий-влак лийыт, тыгак нуно библиотекылаш, тоштерлаш пурен лектыт. Тиддеч посна районласе творческий коллектив-влакат мастарлыкым ончыкташ тӱҥалыт, — ешарен культур министр К.Иванов.

Икманаш, республикна спартакиадым вашлияш да тудым эртарен колташ чыла шотыштат ямде.

 

Спартакиадын программыже

12-13 июль – команде-влак толаш тӱҥалыт, коммиссийым эртат;

14 июль (19.00) – Спартакидым торжественно почмаш («Марий Эл» Ий полат);

14-19 июль – Спортын тӱрлӧ видше дене таҥасымаш-влак;

19 июль (19.00) – Спартакидым торжественно петырымаш («Марий Эл» Ий полат);

20 июль – участник-влак каят.

 

Алевтина Байкова

Д.Речкинын фотожо

Опубликовать в Одноклассники

Добавить комментарий