Йоча-влаклан кеҥеж каныш шукертак тӱҥалын, а Национальный президент сымыктыш школышто кызытат тӱрлӧ семӱзгар йӱк торашке шергылтеш, коридорышто чия пуш шижалтеш. Тыште усталык шӱлышан йоча-влак мастарлыкым шуарат, тунемыт, кушкыт.
Тидланже Россий кӱкшыт гыч полыш шижалтеш. Марий Элыште «Тӱвыра» национальный проектым илышыш шыҥдараш 700 миллион наре теҥге федеральный бюджет гыч ойыралтеш. Тиде проектын ик йыжыҥже талантан еҥ-влаклан полшаш йӧным ышта.
«Творческий шӱлышан еҥ-влак» регионысо проект 2024 ий марте пашам ышта. Тидан 12 миллион утла теҥге ойыралтын. А мемнан республикыште чынжымак кугешнаш улшо самырык тукым кушкеш.
Кодшо изарнян Республикын тӱвыра, печать да калык-влакын пашашт шотышто министрже Константин Иванов да тудын алмаштышыже Михаил Матвеев кундемыштына «Тӱвыра» национальный проектын «Творческий шӱлышан еҥ-влак» регионысо проектын шукталтмыжым онченыт. Нуно Национальный президент сымыктыш школыш миен коштыныт, школын директоржо Николай Смирнов да икмыняр туныктышо дене пырля фортепьяно, кӱсле, домр, скрипке класслаште лийыныт, тыгак тӱрлӧ тӱсан чия дене сӱрет радынам шочыктышо-влакын пашаштым эскереныт.
Тиде школышто тунемше-влак республикыштат, Россий кумдыкыштат чолгалыкым ончыктат. Теве, мутлан, кызыт всемарийский йоча духовой оркестрын самырык музыкантше-влак «Артек» тӱнямбалсе йоча рӱдерыште «Серебряные трубы Черноморья» фестивальыште улыт. А тушко элна мучко ойырен налме эн сай духовой йоча коллектив ден барабанщик-влакын ансамбльышт чумыргеныт. Куанаш кӱлеш, вет нунын коклаште марий ӱдыр-рвезе-влакат улыт.
— «Тӱвыра» национальный проектын «Творческий шӱлышан еҥ-влак» йыжыҥжым ик эн сайлан шотлыман. Молан манаш гын моло йыжыҥлан: «Тӱвыра алан», «Цифровой культур» федеральный бюджет гыч окса ойыралтеш. Мутат уке, тидыже республиклан моткоч кӱлешан да республикыште шуко сай пашам ыштен шукташ полша. А «Творческий шӱлышан еҥ-влак» направлений пӱтынек мемнан деч шога. Мутлан, республикысе сымыктыш, музыкальный школ-влакын тунемшышт Всемарийский йоча хорышто мурат, духовой йоча оркестрыште, йоча симфонический оркестрыште шоктат. Тыге нуно сымыктыш тӱняш кугу ошкылым ыштат. Нине проектлаш тӱжем утла икшыве ушнен. Ме ончыкыжымат йоча-влак дене у проектым илышыш шыҥдараш тӱҥалына. Мутлан, 4 ноябрьыште Республикын кечыжлан Чумыр марий йоча симфонический калык семӱзгар оркестрын премьерже лийшаш. А мемнан республикыште тидым ышташ чыла йӧн уло: домр, кӱсле, балалайке, да моло семӱзгар дене шоктышо ӱдыр-рвезына-влак… Нуным мемнан пофессионал коллектив-влак туныктат. Налаш теве «Марий кундем» калык семӱзгар оркестрым. Тудын лӱмжӧ республикыштына веле огыл, Российыштат чапланен, — каласкала тӱвыра, печать да калык-влакеын пашашт шотышто министр Константин Иванов. — А «Театральное Приволжье» проект годым икшыве-влакын сценыште мастарын модмыштым ужынна. Республикыштына куштымаш искусстват виян. Тений балет школна 20 ияш лӱмгечыжым палемда. Тиде жапыште моткоч кугу кӱкшытыш шумо, шуко пашам ыштыме. Тыгай лектыш Российысе моло регион 50 ийыштат огеш шу. Тачысе кечылан Сапаев лӱмеш опер да балет театрын балет труппыштыжо шкенан выпускникна-влак куштат. Тиде огыл мо мемнан куанна, сеҥымашна.
Чынжымак, Марий кундемыштына йоча-влак тале, виян улыт. Нунын дене кугешныман, а вияҥашышт, мутат уке, кугыжаныш могыр гыч полшаш кӱлеш.
Алевтина Байкова
Авторын фотожо
