Волжский районысо Памар – Сотнур кугорно дене кудалме годым Карай школ ваштареш верланыше йоҥгыдо кумдыкышто торашке волгалтше у мемориал (снимкыште), очыни, кажнын шинчажлан перна. Тудым Кугу Отечественный сарыште вуйым пыштыше-влакым шарныме лӱмеш ял калык, тӱҥ шотышто самырык-влак, шке кӱшеш гаяк шогалтеныт.
Тиде кундемысе калык тӱрлӧ социальный сеть дене кумдан пайдалана. Мутлан, туныктышо-влак WhatsApp системыште шке коклаштышт «Порылыкым ыште!» группым ыштеныт, молодёжь – «Карай ял» группым. Тыге, школ, кундем дене кылдалтше ятыр йодышым шукыж годым мӧҥгӧ гыч лекдеак, икте-весе дене вашлийдеак каҥашат. У мемориалым чоҥаш кӱлмӧ йодышат ончыч нине группышто лектын.
Икмыняр каҥашымек, пырля погыненыт: вер, проект, материал шотышто мутланеныт, тӱҥалме пашам вуйлатен, виктарен шогышым, калык деч оксам погышым палемденыт. Самырык-влак Кугу Ачамланде сарыште ӱмыр лугыч лийше земляк-шамычым шарныме лӱмеш шогалташ палемдыме мемориаллан оксам чаманен огытыл: кӧжӧ ик тӱжем теҥгем пуэн гын, кӧжӧ вич пачаш шуко пыштен. Нунын патриот шӱлышышт ял калыкымат авалтен, тудат окса надырым ыштен. Калыкын тӱҥалтышыжым Пӧтъял ял шотан илем администрацият сайлан шотлен да поро пашалан 59 тӱжем теҥгем ойырен… Тыге монументым, мемориальный оҥам, кермыч пырдыжым, теҥгылым да монь ушышо плитке шартышан мемориал Сеҥымаш кечылан ямде лийын. Таче тудо тыныс илыш верч лӱддымын кредалше, сӧйышто ӱмыр лугыч лийше герой-влакым чапландарен, торашке волгалтеш.
– Мемориал чылт ямдыжак огыл. Иктаж сентябрьыштырак тротуар плиткым теҥгыл деч торашкырак опташ шонена, – мане ялын ик чолга еҥже Евгений Савельев. – Мыйым гына «чолга еҥ» манаш ок лий, мемориалым ыштымаште Карай кундемыште илыше чыла молодёжь чон йӱлен тыршен, кажныже мо дене кертын, тудын дене полшен.
Кугу сарын тулыштыжо вуйым пыштыше земляк-влак лӱмеш келыштарыме чапле мемориал воктеч эртен ошкылат да калыкын мемнан эрыкна верч кредалше-влак ончылно порысым шижмыже, патриот шӱлышан улмыж шотышто кугешныме кумыл шкеак лектеш.
М.ИВАНОВА
