КИДМАСТАР

«Кайыккомбо кашта»

26 июньышто  Йошкар-Оласе Калык арвер сымыктыш тоштер-пӧртыштӧ  «Кайыккомбо кашта» лӱман ончер почылтын. Авторжо – кумдан палыме тӱрлызӧ Лидия Веткина. Тиде ончер Марий Эллан 100 ий темме вашеш да  Лидия Васильевнан 55 ияш лӱмгечыжлан пӧлеклалтын.

 Тудо Шернур район Тамшэҥер ялеш шочын. Марий тӱрым тӱрлаш аваже Елизавета Тимофеевна Волкова да акаже-влак туныктеныт. Тиде пашам кугурак лиймекыжат кудалтен огыл, эре мастарлыкым поген. Тошто тӱр семын, кажне шӱртым шотлен, 1993 ийыште ӱдырамаш шымакшым ыштен. Икманаш, тудо тошто марий тӱрым аралымашке, пӧртылтымашке надырым пышта. 2000 ийыште  Икымше марий вургем конкурсышто тудын кидпашаже-влаклан жюри кугу акым пуэны. Тыгай тӱрызӧ, марий калыкын вургемже тӱржӧ дене тӱрлӧ вере. 2004 ийыште Ханты-Мансийскыште, 2005, 2008 ийлаште Сыктывкарыште, 2007 ийыште Москошто ончерлаште палдарен да мастер-класс-влакым эртарен. А 2016 ийыште тӱнямбал кидмастар-влакын вашталтыме программыж почеш Индийыш миен.

  Лидия Васильевнам «Йыван Кырла» шарнымаш медаль дене палемденыт. Тудо «Калыкын чонжо»  правительствын премийжым (2011 ий) кучыктеныт. «Тӱрлымӧ вынерыште – илыш» ончерже И.С.Палантай лӱмеш Кугыжаныш премийын лауреат званийым  налын.

Кидмастарым шочмо кечыж дене саламлаш тӱвыра, печать да калык-влакын пашашт шотышто министрын алмаштышыже Александр Луничкин, Шернур район администраций гыч Наталья Ямбаршева ден Алена Ямбулатоват,  Марий самырык театрым вуйлатыше, Марий Элын сулло артистше А.Бирюков ден пелашыже, Марий Элын сулло артистше А.Егошина, тыгак йолташыже-влак, родо-тукымжо миеныт. 

— Ты ончерыште кызытсе да ондак ыштыме пашаже-влак ончыкталтыныт.  Эн шерге пӧлек — сӱан шовыч. Тоштерыште улшо марий тӱран экспонат-влакым умбакыжат уэмдаш шонена, — палемдыш тоштер вуйлатыше Татьяна Матвеева.

 Кидмастар Виталий Кудрявцев Л.Веткинан тӱрлымӧ тувыржо юзо виян,  манеш: «Мый тудын тӱрлымӧ тувырым чиенам, садлан кок ганат сеҥыше радамыш лектынам.  Шуко вере конкурслашке пырля коштынна. Шукерте огыл  Оршанке район Тошто Крешыныште усталык пӧртым почмо. Тушко Лидия Васильевнам мастер-классым эртараш ӱжынна».

Искусствовед, шымлызе Тамара Молотова тыге каласен: «Ме пиалан улына. Мемнан дене тыгай талантан, шкешотан кидмастарна уло. Лидия Васильевна тошто, акрет годсо марий тӱрлан у шӱлышым пуэн. Самырык-влакым ты пашаш уша. Тидыже эн шерге. Тыге самырык тукым тудын пашажым умбакыже шуя, шонем».

 М.СКОБЕЛЕВ

Авторын фотожо. 

Опубликовать в Одноклассники

Добавить комментарий