КУЛЬТУР ДА ИСКУССТВО ТЕАТР

Марий самырык театрын — у автобус

М.Шкетан лӱмеш Марий нациоанльный драме театрыште 20 ий пашам ыштымеке, Марий Элын сулло артистше Александр Бирюков Марий самырык театрыш толын. Кодшо идалык мучаште, 28 ноябрьыште, тудо  театрын художественный вуйлатышыжын алмаштышыже сомылым шуктен, а У ий деч вара директорын пашажым тудлан ӱшаненыт.

Вуйлатыше лиймеке, Александр Васильевич эн ончычак молан тӱткышым ойырен? Ончыкыжым ыштышаш пашаже могай? Нине да моло нерген кодшо кечылаште вашлийын мутланышна. 

Александр Васильевич, вуйлатышын сомылжо утларакше озанлык паша дене кылдалтын, маныт…

— Туге, теле каныш жапыште театрын кокымшо пачашысе коридорышто пырдыжым, тувырашым, тошкалтышым чиялтыме, тӧрлымӧ.

Тынар ий театрыште артист лиймеке, вуйлатышылан каяш мо таратен?

— Илыш туге чоҥалтын: айдеме эреак кушшаш. Адакшым спектакльлаштат эреак начальникын але председательын, вуйлатышын рольыштым модынам, модын ситаренам витне (воштылеш). Идалык ончыч МарГУ-што магистратурым тунем лектынам. Коло ий деч вара уэш студент пагытым шарналташ, тунемаш куштылгыжак огыл ыле, но преподаватель-влак тунемаш шонышо-влакым  палемденыт. Тунемме пагытыште театр нерген шуко статья возалтын, шымлыме пашамат эртарыме.

Репертуарымат ончалында, очыни? Иктаж вашталтышым пуртенда мо?

— Репертуарым ончен лектынна, шушаш ийлан планым чоҥенна. Мутат уке, театрыш ончаш толшо-влакым шукемдыме шотышто кутыренна.

— Марий самырык театр шуко спектакльым рушла шында ончыкта. Ончыкыжым марий постановко огеш йом?

— Ме самырык театр улына. Утларакшым йоча, школышто тунемше-влаклан программе почеш келшыше постановкым чумыраш тыршена. Но марий спектакльым шындымым нигунамат огына чарне. Марий возышо-влакын пьесышт почеш кодшо тургымыштат икмыняр у постановкым луктынна. Мутлан, «Торешвате солаште — томаша» спектакльым мыняр гана ончыктенна, калык эреак шуко погынен.  Кызыт Геннадий Гордеевын «Сӧсна поминка. Таче» пьесыж почеш спектакльым грант окса полшымо дене сценыш лукташ ямдылена. Валерий Абукаевын «Каза,  тага да пырыс» марий йомакше почеш спектакльым луктынна ыле. Тудым режиссер Валерий Григорьев шынден. Кеҥежым марий спектакльым кава йымалне икмыняр вере ончыктенна. Мутлан, «Немыч ватым» Яльчикыште модынна, калыклан моткоч келшен, шокшын вашлийын.

Кунам у полат лийын шукта?

— Театрым умбакыже уэмден олмыктымо паша «Тӱвыра» национальный проект полшымо дене 2021-2024 ийлаште ышталтшаш. Проект, документ-влак чыла ямде улыт, кугыжаныш шийвундо ондакырак пура гын, пашам тӱҥалынат кертына. У оралтылан мланде кумдыкымат ешарыме.

Эн куанле увер: кодшо кечылаште театр у автобусан лийын.

— Тиде чынже денак моткоч куанле увер. Нацпроектын «Йоча да курчак театр-влакым вияҥдымаш программе» йыжыҥже почеш Марий самырык театрлан индеш миллион теҥге ойыралтын. Кум миллион кокшудӧ тӱжемлан «Volkswagen Crafter» микроавтобусым налынна. Нижний Новгородыш шкеак миен коштынам. Автобусышто – коло вер. Тудо чыла шотыштат йӧнан: пушкыдо кресле (тудым шеҥгекыла колташ лиеш — авт.), кондиционер, тыгак шеҥгелне да ончылно «коҥга» улыт. Гастрольыш лекме годым шагал огыл кылмаш, пӱжалташ логалын, сандене чыла шотыштат йӧнан транспортымак налаш шонымо. Кодшо арняште изарнян эрденак лектын кудалме, кастене вич шагатлан кондымо. Театр ончылно артист-влак куанен вученыт. 

Тиде шийвундо денак кызытсе илышлан келшыше йӱк оборудованийым, тул аппаратурым, мураш йӧршӧ микрофон-шамычым, тыгак зритель залыш пушкыдо у кресле-влакым налынна. Лишыл жапыште, кӱварым чиялтымеке, нунымат вераҥдаш шонена.

У автобус дене театр коллектив эн ончычак кушко да кунам гастроль дене лектеш?

— Сентябрьыште Чистопольыш кайышаш улына. Кум кече жапыште марий артист-влак спектакль да концерт программе дене калыкым куандараш тӱҥалыт.

А кызыт театрыште могай паша шукталтеш?

— Театрын тӱжвал тӱсшым саемдена, чиялтена, штукатуркым тӧрлена. У тургым деч ончыч изирак-влаклан экскурсийым, мастер-класс-влакым ямдылаш шонена, а артист-влак йоча спектакльым («Малыш и Карлсон») сценыш лукташ ямдылалтыт.

Театрыште могай нелылык уло?

— Мыланна ик специалист, йӱк режиссёр, кӱлеш. Теве шукерте огыл мурызо Виталий Апталиковым пашаш налынна. Тудо радио цехым вуйлата.

 

Икманаш, ыштышаш паша эше ятыр. Театр коллективлан шонымашкыже шуаш да тӱвыргӧ лектышым тыланена.

 

Алевтина Байкова мутланен

Фотом театрын архивше гыч налме

Опубликовать в Одноклассники

Добавить комментарий