27 июньышто Марий Элыш Россий президентын Юл кундем федерал округышто полномочный представительже Игорь Комаров паша дене толын. Тудын Волжск олаш миен коштмыж шотышто калыкын шонымашыжым лудаш темлена.
Александр Михайлович Сташкевич, Марий целлюлоз-кагаз комбинатын генеральный директоржо:
– Россий президентын полномочный представительжын Марий целлюлоз-кагаз комбинатыш толын коштмыжо – Волжскысо кугу предприятийын олан бюджетышкыже чумыр налог гыч кугурак ужашыжым тӱлымыжым пеҥгыдемдымаш. Полпред картоным ыштыме цехым ончыш, производственный линий-влакым ужо, оборудований ден технологический процесс-влакын модернизацийыштым эртарымынам аклыш. Посна акым предприятийын регионын экологийжым веле огыл, а Юлын чумыр экосистемыжым арален кодаш тыршымыжлан пуыш: комбинат эрыктыме сооруженийым чоҥымо шотышто кугу проектым илышыш пурта.
Федеральный кучемын промышленностьлан ойырымо тӱткышыжӧ моткоч кӱлешан, округ ден республикын вуйлатышышт калыкын илышыжым саемдыме шотышто регионын экономикыжым вияҥдаш кӱлмым сайын умылат. Садланак производитель-шамычлан льготан ассигнованийым, лизинг йӧн дене кызытсе жаплан келшыше оборудованийым налаш полша. А мемнан коллективна-шамыч тидлан сай паша лектышышт дене вашештат.
М.ИВАНОВА
