«Йошкар гвоздике» акций полшымо дене Кугу Отечественный сарын Россий Федерацийын чыла регионыштыжо илыше ветеранже-влак кӱкшӧ технологиян медицине полышым налыт.
«Тукым-влакын шарнымышт» поро кумыл фондын Россий мучко организоватлыме «Йошкар гвоздике» патриотический акцийже мучашке лишемеш. Тудын «Мый шарнем. Мый полшем» девизше почеш йошкар пеледышым ончыктышо шарнымашан значок-влакым пуэдыме. Нуным боевой действийлаште лийше ветеран-шамычлан тауштымо семын оҥыш пижыктен кошташ лиеш.
2019 ийыште «Йошкар гвоздикын» географийже 65 гыч 85 регион марте шарлен. 83 регионышто акций волонтёр-влакын полшымышт дене эртен – кодшо ий дене таҥастарымаште нунын чотышт куд пачаш утла кушкын. Куд тӱжем наре доброволец значокым парклаште, скверлаште да оласе рӱдӧ уремлаште пуэден. Тудым тыгак акцийын партнёржо лийше сетевой кевытлаште, автозаправкылаште темленыт. Поро кумыл акций 2018 ийысе семынак «Сеҥымашын волнтёржо-влак» всероссийский мер толкынын полшымыж дене эртен. Тудын еҥже-шамыч Российын 79 регионыштыжо уло кумылын пуымо средствам погеныт. Тылеч посна проектышке шуко регионышто «ший» волонтёр-шамыч – кугурак тукым доброволец-влак – ушненыт.
Акций годым кок миллион утла значокым шаркалыме да поро пашалан 22 миллион утла теҥгем погымо. Тиде средствам тичмашнек ветеран-влаклан кӱкшӧ технологиян медицине полышым пуаш колтымо.
«Йошкар гвоздике» акций – ветеран-влакым пагалыме да шарныме веле огыл, тыгак нине еҥлан чынже денак полшымо проект. 2019 ийыште тудо икмыняр миллион россияным ветеран-влаклан шергакан эмым, инвалид коляскым, колмо аппаратым налаш, неле медицине операцийлан тўлаш полшымо пашаш ушен. Шкенан партнёр, специализироватлыме волонтёр организаций, кугу ритейлер, логистике компаний, банк, эсогыл сетевой автозаправке-влаклан тауштена. Нунын участийышт дене палынак шуко оксам поген да адресный полышым налын кертше ветеран-шамычын чотыштым кугемден кертме», – палемден «Тукым-влакын шарнымышт» фондын директоржо Екатерина Круглова.
М.ИВАНОВА
