8 июль – Еш, Йӧратымаш да ӱшанле улмо кече. Тидын вашеш шушаш кугарнян, 5 июльышто, Йошкар-Олаште тӱрлӧ мероприятий-влак эртат.
Пайрем 10 шагат эрдене «Компас прав ребенка: региональные практики и инициативы» конференций дене тӱҥалеш. Тудо Национальный президент искусство школышто лиеш. Кечывалым, 12 шагатлан, Сеҥымаш бульварыште «Пиалан еш» памятник воктене «Еш аллей» мероприятий эрта.
Пайремым 13 шагатат 30 минутлан Патриарший площадьыште торжественно почыт. Тушто «За любовь и верность» медаль дене палемдалтше еш-влакым саламлат. Тыгак «Идалыкын ешыже» всероссийский конкурсын регионысо этапыштыже сеҥыше-влак дене палдарат. Тиде жапыштак кумылан-влак мастер-класслашке ушнен, кидмастар-влакын пашаштым ярмиҥгаште аклен да келшышыжым налын кертыт.
Еш, йӧратымаш да ӱшанле улмо кече лӱмеш эртаралтше пайрем «Счастлив тот, кто счастлив дома» концерт дене мучашлалтеш.
Л.Камалетдинова.
