беспилотник
УВЕР ЙОГЫН

Пилот деч посна

Марий Элыште чодыра озанлык пашам шуктымаште тений гыч квадрокоптерым — пилот деч посна виктарыме чоҥештылше аппаратым — утларак кучылташ тӱҥалыт.

Тидын шотышто Марий Элын Чодыра да сонар озанлык министерствыштыже посна семинар эртен. Тыгай аппарат тудым дистанционно виктарыме почеш чодыра инвентаризацийым шке гыч эртарен, пожарым, зокондымын участкым руымым шекланен, янлык-влакын кушто коштмыштым, илымыштым  рашемден кертеш. Икманаш, у технике чодыра отрасльыште ыштыше-влакын пашаштым палынак куштылемдышаш. Семинарын кокымшо ужашыштыже квадрокоптерым пашаш колташ туныктеныт. Каласен кодыман: тыгай аппаратым ик эн ончыч «Клён» ООО шкаланже налын.

Квадрокоптерым налаш негызшат уло, молан манаш гын тений март гыч чодыра кумдык дене дене пайдаланыше-влак участкышытлан авиационный да космический съемкым, фото да видеофиксацийым шкак ыштышаш улыт. Чодыра кодексыш ты шотышто тыгай вашталтышым кодшо ий июньышто пуртеныт.

Снимкыште: теве тудо — пилот деч посна чоҥештылше у технике.

С.Носова.

Опубликовать в Одноклассники