Калыкыште 4 июль Улянан кечыже семын палыме. Таче писте пеледышым погаш келшыше ик эн сай кечылан шотлалтеш. Улянан кечылан пакчаш уэш редисым ӱденыт. Помидор лышташ ден пеҥгыдемше чеснок пучым кӱрын налын, пеледышым да пакчасаскам тӱрлӧ шукш-копшаҥге деч аралаш кочо настойым ямдыленыт.
Ты кече дене кылдалтше пале-влак:
- Йӱдым вочшо лупс кошкен ок шу гын, кӱдырчан йӱр лийшаш.
- Тумдек (вӱд лилий) эрдене вӱд ӱмбач пыкше нӧлталтеш – кечывал деч вара йӱр пура, маныныт.
- Кӱдырчӧ шуйдарен кӱдырта – кужу лавыртыш лийшаш.
- Йӱр деч вара кече чот пелтен когарта гын, кас велеш адакат йӱр толшаш.
- Кӱ ӱмбалан вӱдыжгӧ погына – южвӱдым вучо.
- Кӱртньышудо лышташ йымакыла пӱтырналтын туртеш гын, ояр игече, шаралтын чымалтыт – лавыртыш лиеш.
- Пыл-влак чумыргат – игече кужу жаплан йӱкшемда.
- Кӱдырчан йӱр деч вара шонанпыл эрвел гыч касвелыш лупшалалтеш – оярештеш, игече писын тӧрлана.
- Шӱдыр йыр йошкарге ден ош оҥго гай тыртыш коеш гын, эрлашын ояр да шокшо кече лийшаш.
- 3 июль гыч 4 июль йӱдым ужмо омо писын шушаш.
Р.ЧЕПАКОВА
