СПОРТ

Сай верлан ӱшан уло

Вашке Инвалид-влакын III всероссийский кеҥеж спартакиадышт тӱҥалеш. Тудлан кузе ямдылалтмым Марий Эл вуйлатыше шкежак эскера.

Тушто чылаже кок тӱжем наре участник вийжым терга. Марий Элын командыштыже 53 еҥ (14-18 ияш) лиеш. Таҥасымаш-влак Йошкар-Оласе «Дружба» стадионышто, воктенак улшо теннис кортышто, «Спартак» физкультурно-тазаҥдыме комплексыште, Вӱд спорт полатыште эртат.

Эртыше кечылаште иймаште вийым тергаш ямдылалтше-влак дене вашлийынна. Ӱдыр-рвезе-шамыч лач бассейныште («Йошкар-Ола» вўд полат) тренировкым эртат ыле. Кажныже палемдыме кужытым тыглай ласкан ийыт. Тренерышт – В.Полянин.

– Ты видыште 13 еҥ таҥасаш тӱҥалеш. Тӱшкам шотыш налын, 50, тыгак 200 метр кужытышто ныл-куд еҥ стартыш лекташ ямдылалтыт. Нелыт изижак огыл. Призёр радамыш логалыт, республиклан очком кондат манын ӱшанена, вет нунын коклаште Россий первенствын участникшат улыт. Мутлан, шке ийготанже-влак коклаште Клим Румянцев – Россий первенствын сеҥышыже, а  Наталья Семёнова – Россий первенствын призёржо, – манеш республикыште иймаш дене паралимпийский школын тренерже В.Полянин. – Ӱдыр-рвезе-влак кажне кечын кок гана тренировкым ыштат. Тудыжо шке радамже дене кая. Бассейныш толыт, палемдыме дистанцийым ийын эртат. Тыглай таза айдеме тынар кужытым ийын эртен ок керт, шонем, а нуно тидлан ынде тунемыныт. Календарный план почеш Россий кӱкшытан таҥасымаш  кокыт веле. Элнан кубокшо верч стартыш лектыт да Российын первенствыштыже вий-куатыштым тергат. А тиде спартакиаде могай кӱкшытыш шумыштым, молан ямде улмыштым, икманаш,  шкештым ончыкташ эше ик йӧн. Мутат уке, тазалык эн тӱҥ. Иймаш спортын универсальный видше, тудо капкыллан моткоч пайдале. Сандене кажне еҥлан бассейныш толаш, кеҥежым эҥер ден ерлаште ияш, йӱштылаш темлем.

 

Иймаш дене паралимпийский школ регионыштына 2012 ий гыч пашам ышта.

III всероссийский кеҥеж спартакиадын финалыштыже коштын кертдыме, уш-акыл дене начарын вияҥше, церебральный паралич черан, соҥгыра, сокыр участник-влаклан посна таҥасымаш лиеш.

 

Е.ЭШКИНИНА.

Опубликовать в Одноклассники

Добавить комментарий