21 июньышто Марий Эл вуйлатыше Александр Евстифеев Уфаште лийше Округын советшын заседанийышкыже ушнен. Тудым РФ Президентын Юл кундем федеральный округышто полномочный представительже Игорь Комаров эртарен.
Субъект вуйлатыше-влак, Федераций Советын, Российысе министерстве ден ведомство-влакын еҥышт пеҥгыде коммунал шӱкшак (ТКО), Юлым тазаҥдарыме йодыш-влакым каҥашеныт.
Игорь Комаровын мутшо почеш, лишыл ийлаште регион-шамычлан ТКО дене ышташ кӱлшӧ инфраструктурым ыштыме шотышто пашам шуйыман. Национальный проект дене келшышын, тидлан шагал огыл оксам ойыраш палемдалтеш. Субъект-влаклан шийвундым пайдалын да жапыштыже кучылтман.
Заседанийыште Юлым тазаҥдарыме да экологический эҥгек погынышо объектлам пытарыме шотышто округысо регионлаште сӱрет могай улмым рашемдаш пашаче группо шымлымашым эртарен.
— Советын заседанийжын иктешлыше материаллаштыже пален налме неле йодыш-влак ончыкталтыныт да нуным решатлыме шотышто темлымаш-влакым федеральный, региональный да верысе кучем коклаште шеледен палемдыме, — каласен полпред.
Республикыште ТКО шотышто могай паша ышталме нерген Александр Евстифеев тыге каласен:
— Ятыр показатель дене регионышто сӱрет сай. Экологийым аралаш, йырым-йырысе пӱртӱсым йӧраташ да тудын верч умбакыжат азапланаш калыкна ямде. Но тиде мемнан тургыжландарыше йодышна-влак уке нерген огеш ойло – лекше нелылыкым вигак тӧрлена: региональный оператор пашам кӱлын шукта, свалке-влак верланыме кумдыкысо мландым шотыш кондена.
Юлым тазаҥдарыме шотышто тыге палемден:
— Ме причал-влакым чоҥена, серым пеҥгыдемдена. Тыгак тиде – турист да судно-влакын коштмышт дене кылдалтше йодыш-влак. Ты шотыштат ме чолган пашам ыштена.
Тачысе кечылан республикыште 2000 утла евроконтейнерым налме да вераҥдыме. Пилотный проект дене келшышын, пластик шӱкшакым погаш Йошкар-Олаште 102 посна контейнерым шындыме. Тений идалык мучаш марте эше 50 ешаралтшаш.
Тыгак Советын полощадкыштыже Александр Евстифеев Рустам Минниханов дене Спартакиадын участникше-влакым шупшыкташ Татарстанын транспортшым кучылтмо нерген мутланен. Ушештарена, 12 гыч 20 июль марте Марий Элыш Россий Федерацийысе 71 регион гыч участник ден уна-влак толшаш улыт. Санденак кызыт «Транспортная компания «Буревестник» ООО дене вашкыл ышталтеш, палдара Марий Эл вуйлатышын организаций да аналитике виктемже.
Л.КАМАЛЕТДИНОВА.