ЯЛ ИЛЫШ

«Мо марлан толынам, эре ушкалым кучена»

Тыге ойла Волжский район Ӱлыл Азъялыште илыше Т.А.Иванова.

Кодшо арнян ты кундемыште лиймына годым ял калык шудым ышташ тӱҥалын гына ыле. То ик сурт пеленсе участкыште бензокосилке дене, то ял лишне олыкышто трактор дене шудым солышо-влак койыт. Шудым ышташ полшаш икшыве-шамычат толыныт. Суртозан, Евгений Ильичын кидыштыже бензокосилке вы-ыж шоктен модеш веле. Воктеныжак пелашыже, Тамара Александровна, пеле кошкышо шудым куштылго пу шорвондо дене оварта.

Шудым таче тӱҥална. Ончыч пӧрт пеленсе участкым солена. Икымше косым солен налмеке, тышан презым вӱраҥлена. Тылеч посна эше кок пасуна уло. Иктыже  –10, весыже 15 сотык. Умбал пасуштына люцерным ӱденна, тушеч кок косым налына, – палдара озавате. – Мемнан ушкал ден презе веле, шорыкым огына кучо. Такшым гын ялыштынажат шорыкым шукынак огыт ончо. Ала-кӧн кум шорыкшо коштыт ыле. Кызыт вет ончычсо гай кугу ял кӱтӱ, кӱтӱчат уке. Черет дене кажныже шке кӱтена. Ик ушаллан ик черет, тылзылан ик гана логалеш.

Тамара Александровнан ойлымыж почеш, шӱдӧ деч утларак суртан ялыште 32 ушкалым ашненыт, но коктынжо шукерте огыл ужаленыт. Кок ешын кок вуй дене лийын, тений кажныже икте гыч ужален.

Ялысе шудо солымо вер нерген ойлаш гын, ончыч олыкышто веле огыл, чодыра аланыштат, солыде ик лукат огеш код ыле. Автомашинан але тракторан шофёр – шудым солымо жапыште ик эн кӱлешан еҥ. Кажныже, шке семынже шотым муын, вольыклан шудым ямдылаш тыршен. А кызыт гын, кушко от ончал, тушто шудым ышташ лиеш гынат, вольыкым ончаш огыт тырше. Мемнан дене самырык еҥлан паша уке. Пошкудынат теве Волжск олаш пашаш кажне кечын кудалыштеш да вольыкым ужалашыже логале. Ялыште кеҥежым паша ситыше – ыштен шукто веле. Пареҥге пакчамат жап ден урен шуктыман, йыраҥ коклаштат шӱкшудым кӱрын эрыктыман. Мемнан газ уке, пумат ыштыман, шудымат жап дене ямдылен шукташ кӱлеш. Шкежат самырыкшак огынал, йӧра эше икшыве-шамыч полшенак шогат. Теве пакча шеҥгелне вольыклан ушменым ончен куштена. Пече пелен солымо шудынам поген налнена. Кече сай гын, кок кечыште поген пышташ лиеш ыле. Таче солена, эрла овартен тарватена, йӱр ок лий гын, кумшешыжланлан поген налаш кӱлеш.

Теле гоч вольыкым пукшен лукташ ныл трактор наре кукшо шудыжо кая. Ялыштына шӧрым огыт пого. Южыжо олаш ужалаш наҥгаят, мый гын ужалаш ом кошт. Ӱйым, торыкым ямдылаш да моло кӱлешланат шӧрым кучылтам, сӧсналан пукшем.

Р.Чепакова.

Снимкылаште: Суртоза ик лукыштат шудым солыде ок кодо. Йӱр ок лий гын, поген пышташ лиеш.

М.Скобелевын фотожо.

 

Опубликовать в Одноклассники

Добавить комментарий