Республикысе общеобразовательный организацийлаште Иктешлыше кугыжаныш экзаменын тӱҥ этапше мучашлалтын. Кызытеш лектыш 7 предмет дене пале.
100 баллым чылаже 26 выпускник поген:
химий дене – 4;
математике (профилян) дене – 6;
руш йылме дене – 11;
физике дене – 5.
– Тиде сӱрет моткоч куандара, вет ӱмаште уло ЕГЭ кампанийлан 16 самырык еҥ гына тынар баллым поген кертын. Тений сай шинчымашым ончыктышо-влак эшеат шукемыт манын ӱшаныме шуэш. Палемдыман: ты гана экзаменым кучымо эн изи «лондемым» (тидлан 36 баллым погаш кӱлеш) вончен кертдыме ӱмашсе деч 2,04 процентлан шагалемын. Тидын деч посна тений изиш гына 100 баллыш шушо (81-99 баллым погышо) выпускник шукемын: 2018 ийыште 4,94 процент лийын гын, 2019 йиыште – 11,24 процент, – палемдыш Марий Эл образований да науко министр Н.Адамова.
Эн сай шинчымашым ончыктышо 26 ӱдыр-рвезе гыч эн шукынжо (11 еҥ) 100 баллым руш йылме дене погеныт. Обязательныйлан шотлалтше тиде предмет дене экзаменым кызытеш чылаже 3017 выпускник кучен.
Физике дене ЕГЭ-м мемнан регионышто 1157 самырык еҥ ойырен.
Г.КОЖЕВНИКОВА
