Марий Элын «Йошкар книгашкыже», эр шошым пеледше лютик сынан алтайысе, тумер ветреничкым, кӱдыроҥгырым, урал кӱдыроҥгырым, хохлаткым, Маршалын хохлаткыжым, кишкышинчам, сепсыльым (кечыйолшудо) пуртымо. Шуэн вашлиялтше пеледыш поянлыкнам йомдараш огыл манын, Марий Элын Чодыра да сонар озанлык министерствыжын специалистише-влак пӱртӱсым аралыме дене кылдалтше законодательствым шотыш налаш йодыт. Нине пеледшым ни погаш, ни ужалаш лукташ огеш лий. «Йошкар книгаш» пуртымо пеледышым погымылан, налмылан, ужалымылан але тудым ик вер гыч весыш налын колтымылан, «Йырым-йырысе средам аралыме нерген» федеральный законын 60-шо статьяжын икымше пунктыштыжо ончыктымо дене келшышын, административно мутым кучаш шогалтат.
С.Носова
