ТАЗАЛЫК

Яндар шонымашлан – волгыдо корным

Марий Элын Тазалыкым аралыме министерствыштыже Россий Федераций президент Владимир Путинын тӱҥалтышыж почеш илышыш пуртымо «Тазалык» нацпроектын регионысо проектше-влак шотышто брифинг-влак серий дене эртат, манаш лиеш. Черетан мероприятийым министрын алмаштышыже Т.Королева эртарыш. Тудо республикысе журналист-влакым «Медицине услуго-влакын экспортыштым вияҥдымаш»,  «Здравоохранений аланыште единый кугыжаныш увер системе негызеш единый цифровой контурым ыштымаш» да «Здравоохранений системысе медицине организацийлашке квалифицироватлыме медицине кадрым ситарымаш» проект-влак дене радамын палдарыш.

Татьяна Евгеньевнан мутшо почеш, кум проектшат организационныйлан шотлалтыт, но нунын деч посна тазалыкым аралыме системым умбакыже вияҥден колташ огеш лий.  

Йот студент эшеат шуко лиеш

Таче кундемыштына 35 медицине тӧнеж кокла гыч кокыт деч молыжо йот граждан-шамычлан медицине услугым пуаш ямде улыт, поснак – амбулаторий да поликлинике условийыште.

2017 ийыште йот граждан-шамычлан медицине услугым пуымо дене республикна чумыржо 3,652 млн.теҥгем ыштен налын.   

«Медицине услуго-влакын экспортыштым вияҥдымаш» региональный проектым илышыш пуртымо тӱҥ цель йот граждан-шамычлан медицине услугым вич талук жапыште 2017 ийысе деч ныл пачаш шукырак пуымо дене кылдалтын. Тидланже медицине организаций-влакын йот граждан-шамычлан услугым пуымо чотышт, ты шотыштак оксам ыштен налме кугытышт шотышто мониторинг системым, йот граждан-влакым Марий Элыште  лачшымак могай медицине услуго дене пайдаланен кертмышт дене палдарыме программым (тидлан 1,246 млн. теҥгем ойырымо), медицине услугын экспортшым вияҥдыше организаций-влаклан стратегий ден методический темлымашым шыҥдарат.

Проектын утларак ужашыжым йот студент-шамычлан шинчымашым пуышо Марий кугыжаныш университет ден «Волгатех» полшымо дене шуктат: 2020/2021 ийлаште 3000 марте (кызытсе деч 1000 еҥлан шукырак) йот гражданым тӱҥ шотышто Узбекистан, Таджикистан да Индий гыч тунемаш налыт. А нуныжо, мутат уке, медицине организаций-влакын услугышт дене пайдаланыде огыт керт.

Республикыштына йот граждан-влаклан медицине услугым пуымо нерген англичан йылмыш кусарыме увер сынан материалым ямдылат. Тылеч посна регионысо медицине тӧнеж-шамыч тӱрлӧ кӱкшытан ончерыште, мутлан, ий еда эртаралтше «Тазалык индустрий. Казань» тӱнямбал специализироватлыме выставкыште, участвоватлат.

Чыла услуго – цифрыште

– «Здравоохранений аланыште единый кугыжаныш увер системе негызеш единый цифровой контурым ыштымаш» проект республикысе кажне медорганизацийыште Здравоохраненийын единый кугыжаныш увер системыже (ЕГИСЗ) негызеш вашкыл механизмым вияҥдымашке виктаралтын, – кокымшо проект дене палдарыш Татьяна Евгеньевна. – Марий Эл регионысо медицине организацийлаште увер системым 2014 ий гычак вияҥдаш тӱҥалын. Ты шотышто поснак Региональный медицине увер системым (РМИС) палемдаш лиеш. Ме тудым ЕГИСЗ федеральный сервисыш пуртен шуктенна гаяк, сандене кызыт тымарте ыштымынам у модуль да сервис-влак дене уэмдаш, увер системын пашажым кумдаҥдаш кодеш.

У модуль-шамычым шыҥдарыме деч вара регионысо медицине организаций-влак шке коклаштышт электрон документооборот да отрасль дене кылдалтше моло увер системе (ФСС, МСЭ, ЕГИССО) дене пайдаланаш тӱҥалыт. Тиде механизм пациентлан медицине полышым писынрак да тичмашын налаш йӧным пуа: ФАП-ыште але райрӱдысӧ поликлиникыште лиймыжым, мутлан, Республиканский клинический больницыштат ужын кертыт. Икманаш, приёмыш толшо пациентын тазалыкше дене кылдалтше уверым республикысе чыла медицине организацийыште электрон йӧн дене  почын ончен сеҥат. Тыгеже черлын маршрутизацийжымат эскераш куштылго: иктаж йыжыҥыште йоҥылышрак колтымо гын, тудым тӧрлаташ йӧн лектеш. Тылеч посна эше черын посна профильже дене медицине полышым пуымо, телемедицинский консультацийым организоватлыме да моло мониторингым эртараш каньыле лиеш.

Проект полшымо дене пациент-влак врачын приёмышкыжо, диспансеризацийыш, профосмотрыш шке семын возалтме деч посна эше специалистым мӧҥгышкышт ӱжыктен кертыт.  

Нине задачым шукташ, мутат уке, шагал огыл окса кӱлеш. Проектым илышыш пурташ чумыржо 1049,05 млн. теҥге ойыралтеш, тышечын утларак ужашыже (772,95 млн. теҥге) – федеральный бюджет гыч. Тений 137,8 млн. теҥгем кучылташ палемдыме. Тиде окса дене медицине тӧнежлаште 1116 единице компьютер ден офисыште пайдаланыме 455 единице техникым, сервер ден ViPNet-оборудованийым уэмдат, врач-шамычлан электрон-цифровой кидпалым (подпись) налыт, РМИС-ыш у модуль-влакым шыҥдарат, федеральный сервисыш тичмашнек ушнат.

Цифровой контур кышкарыште 2019 ийыште, РМИС-ым кучылтын, региональный централизоватлыме системым шыҥдарат:

– азам ыштыме электрон сертификатым (ФСС);

– инвалид-шамычын реестрыштым (МСЭ);

– ЕГИССО дене интеграцийым;

– «112 системе» да ГЛОНАСС дене кылым ыштыме «вашкеполыш» (ты шотыштак санитарный авиаций) виктемым;

– льготан эмым ситарыме виктемым;

– пациент-влак йогын виктемым.

Кызыт медицине организаций-влаклан компьютер ден офисыште пайдаланыме техникым налме шотышто аукционым эртарыме.

Окса да илыме вер дене сымыстарат

Республикысе медицине тӧнежлаште врач ден кокла медпашаеҥ-влак ситыдымым СМИ гоч веле огыл палена, тидым поликлиникыш ма эмлымверыш мийымына годым шкежат пеш сайын шижына. Таче мыланна участковый врач-терапевт ден врач-педиатр, врач-акушер-гинеколог, вашкеполышым пуышо врач, врач-онколог, врач-анестезиолог-реаниматолог, врач-психиатр, врач-неонатолог, врач-кардиолог-влак моткоч кӱлыт.

– «Здравоохранений системысе медицине организацийлашке квалифицироватлыме медицине кадрым ситарымаш» проект лачшымак кадр ситыдыме йодышым кораҥдымашке виктаралтын, эн ончычак – первичный звеношто: амбулаторий ден поликлиникылаште,– мане Т.Королева. – Республикыштына мыняр медпашаеҥ кӱлмым рашемдыме да тиде данныйым Российын Минздравышкыже колтымо. Чылажат шке радамже дене кая гын, регионыштына 2024 ийлан врач-влак 39 процентлан ешаралтыт, кокла медпашаеҥ-шамыч – 22 процентлан.

Тылеч посна тиде проект медицине шинчымашым кӱрылтде пуымо системыште медпашаеҥ-влакым кӱлын ямдылаш йӧным ышта. Тудын дене келшышын, кажне медпашаеҥ квалификацийжым нӧлтен, келшыше тестым эртен кертеш.

Медицине специалист-влак пашашке кумылын толышт манын, ятыр мероприятийым организоватлыме. Нунын кокла гыч поснак подъёмный манме выплатым пуымо, служебный пӧртым, пачерым але пӧлемым ойырымо, айлыме илыме верын, илыме-коммунал услугын роскотыштым пӧртылтымӧ мера-шамычым палемдыман. Тылеч посна «Ялысе доктор» ден «Ялысе фельдшер» программе-влак пашам ыштат. Тушко ынде самырык-влак веле огыл, опытан специалист-шамычат ушнен кертыт. Ялысе медицине тӧнежыш пашам ышташ толшо докторлан 1 млн. теҥге ойыралтеш гын, фельдшерлан – 500 тӱжем теҥге.

Шочмо кундемыш пӧртылаш кумылышт лийже манын, элнан медицине вузлаштыже тунемше студент-влак дене эшеат пеҥгыде кылым ышташ палемдыме. Проектыш профессийым ойырен налаш полшымо пашамат пуртымо.      

– Проектым илышыш пуртымо пашан лектышыже Марий Элын здравоохранений системыжым 2024 ийлан сайын туныктымо специалист-влак дене ситарымаш лийшаш, – палемдыш Татьяна Евгеньевна.

Тиде проектлан целевой оксам ойырымо огыл. Но амалкалче пашам шуктымо окса дене студент-влаклан социальный полышым пуаш, тыгак Йошкар-Оласе медколледжыште симуляционный рӱдерым мучаш марте шотыш кондаш палемдыме.

Маргарита ИВАНОВА

Снимкыште: Т.Королева.

Авторын фотожо.

Опубликовать в Одноклассники

Добавить комментарий