Кажне ийын 14 июньышто ООН-ын составышкыже пурышо 193 элыште Вӱр донорын тӱнямбал кечыже палемдалтеш. Тений тудо «Чылалан – лӱдыкшыдымӧ вӱрым!» девиз дене эртен.
Республикысе вӱрым пуымо станцийын тӱҥ врачше Екатерина Зангерован мутшо почеш, 2019 ий 1 январьлан Марий Элыште 3339 почётан донор шотлалтын. Регионыштына илыше 3500 утла еҥ вӱрым эксыде пуа. Тиде але вес группо вӱр чот кӱлмӧ годым станцийын пашаеҥже-влак лачшымак нунын деч полышым йодыт. А тичмаш налмаште, республикыштына донор ала-мыняр пачаш шуко, вет вӱрым ик гана пуышыжо кажныже улына, очыни.
Республикысе вӱрым налме станций Донорын кечыжлан пӧлеклалтше кок акцийым Йошкар-Оласе пелепроводник заводышто да «Марийское» ЗАО-што эртарен.
Таче республикысе медицине тӧнеж-влаклан кӱлшӧ вӱр шапаш ситышын уло.
М.ИВАНОВА
