КРИМИНАЛ

Кок ийлан эрык деч посна коден кертыт

Марий Эл Республикысе ончычсо ялозанлык да продовольствий министр Ираида Долгушева эше министрын алмаштышыже улмыж годым преступленийым ыштымыжлан титаклалтеш. Тудым 2 ийлан эрык деч посна коден кертыт.

Россий следствий комитетын Марий Элысе следствий управленийжын Йошкар-Оласе следствий отделже 61 ияш ӱдырамаш шотышто «служебный подлог» статья почеш уголовный делам тарватен. Следствийын версийже почеш, 2015 ийыште республикысе ялозанлык да продовольствий министрын алмаштышыже официальный документ-влакым кум гана шояклен возен, шке кидпалыжым шынден да тылеч вара «Акашевская» чыве фабрикылан «Марий Эл Республикыште ялозанлыкым вияҥдымаш» программе дене келшышын окса ойыралтын.

— Предприятийыште окса шотышто сӱрет сай улмым, паша сайын кайымым пеҥгыдемдыше шояк документ-влак негызеш бизнесшым вияҥдышашлан агрохолдинг банклаште кредитым налын, — палдарат Марий Элын прокуратурыштыжо.

Марий Элысе промышленность да корно озанлык министерствын данныйже почеш, 2016 ий октябрь тӱҥалтыште тиде чыве фабрике Ткачев лӱмеш агрокомплексын составышкыже пурен.

Мо кузе лийме шотышто кызыт следствий кая. Тудым прокуратур контрольыш налын. Правам аралыше орган-влак республикысе ялозанлык да продовольствий министерствын зданийыштыже, «Акашевская» чыве фабрикыште да Ираида Долгушеван пӧртыштыжӧ обыскым эртареныт. Тыгодым документ ден электрон носитель гыч уверым поген налыныт. Шымлымаш ден тергымаш умбакыже шуйна.

Л.Камалетдинова.

Опубликовать в Одноклассники