Шошо ага мучашлалтмеке, кеҥеж пагытын ик эн йӧратыме пайремже теният чот гӱжлен. Тудо кодшо шуматкечын,15 июньышто, Йошкар-Олаште эртен.
Тушко Российын тӱрлӧ кундемже гыч марий-влак толыныт. Пӱртӱс Юмылан кумалше-влак эрдене Йошкар-Оласе Тумер аланыш Агавайремыш лектыныт.
Кечывал лишан В.И.Ленин лӱмеш культур полат ончылно Киров, Свердловск областьла, Пермь кундем, Башкортостанын, Татарстанын, Удмуртийын, тыгак Марий Элын чыла гаяк районжо гыч марий шӱлышан коллектив, еҥ-влак рӱж чумыргеныт. Кажныже моторын сӧрастарыме вургемже, сылне мурыжо, кумылым нӧлтышӧ семже дене ойыртемалтын.
Нуно чыланат колонныш шогалын, мурен, куштен, ончен шогышо-влакым пайрем дене саламлен, Йошкар-Оланан рӱдӧ уремлаж дене эртыме.
Молгунамсе дене таҥастарымаште тений пайрем колонно изиракла чучо, М.Шкетан лӱмеш Марий национальный драме театр ончылнат калык шагалрак ыле, векат юалгырак игече южыштым лӱдыктен. Туге гынат тӱрлӧ кундем гыч толшо марий-влаклан палымыштым ужын мутланаш моткоч сай йӧн лийын.
Марий калыкым Пеледыш пайрем дене эн ончычак республик вуйлатыше Александр Евстифеев саламлен да ялозанлык пашаште тыршыше-влаклан сай игечым, тӱвыргӧ саска лектышым, тазалыкым да тыныслыкым тыланен.
— Агропромышленный комплекс – республикын экономикыжын ик эн кӱлешан ужашыже. А ме Марий кундемна дене кугешненат кертына. 2018 ийым иктешлыме почеш, Юл кундем федерал округышто республикна – икымше, а Российыште ялозанлык продукцийым ыштен лукмо дене — визымше верыште, — палемден регион вуйлатыше. — А тиде – моткоч сай лектыш. Марий Элыште илыше-влакын пашам йӧратен ыштымышт, шочмо мландым йӧратымышт нерген ойлен кертына.
Тиддеч вара саламлыме шомакым Тӱҥ онаеҥ Александр Таныгин, Оньыжа Эдуард Александров, Кугыжаныш Погын председательын алмаштышыже Анатолий Иванов да молат ойленыт.
Йӱла почеш, ты ганат пасу пашаште тыршыше-влакым саламлыме тат эн вучымо лийын. Ялозанлык да продовольствий министр Александр Гречихо чылаштым пайрем дене саламлен да ойыртемалтше-влаклан Чап грамотым да окса премийым, а южылан кубокым тыгай номинацийлаште кучыктен:
— «Эн сай муниципал район» – Советский район;
— «Эн сай ялозанлык» (5 тӱжем утла гектарыште икияшым ӱдымаште):
I вер – «Шойбулакский» племзавод (Медведево район);
II вер – «Семёновский» племзавод (Медведево район);
III вер – «Первый Май» колхоз (У Торъял район).
.
— «Эн сай ялозанлык» (1 гыч 5 тӱжем марте гектар марте икияшым ӱдымаште):
I вер – «Москва» озанлык (Волжский район);
II вер – «У илыш» озанлык (Советский район);
III вер – «Земледелец» озанлык (Шернур район).
— «Эн сай ялозанлык» (1 тӱжем гектар марте икияшым ӱдымаште):
I вер – «Рассвет» ялозанлык кооператив (Курыкмарий район);
II вер – «Восход» ялозанлык (Курыкмарий район).
— «Эн сай механизатор-влак»
I вер – Александр Ефимов («Семёновский» племзавод Медведево район);
II вер – Сергей Соловьёв («Первый Май» ялозанлык, У Торъял район);
III вер — Андрей Армяков («Шойбулакский» племзавод, Медведево район).
Пайремым почмаште кумылым нӧлташ Оршанке район гыч «Шонанпыл», «Марий памаш» ансамбль-влак да М.Шкетан лӱмеш Марий драме театрын артистше-шамыч полшеныт.
Варажым пайремыш погынышо-влак Мер Каҥашын тистыж почеш Тӱвыра да каныме рӱдӧ паркыш ошкылынна.
Алевтина БАЙКОВА
М.Скобелевын фотожо
