КУЛЬТУР ДА ИСКУССТВО

«Бендериаде»  эртыме верым ончен савырненыт

«Бендериаде» мыскара да койдарчык фестиваль марте тылзе утларак жап кодеш. Молгунамсе семынак тудо Козьмодемьянскыште эрта.

Лач тушто 27 июльышто Остап Бендер шахмат дене иканаште чыла дене модеш, кумылан-влак аукционыш ушнен, Ильф ден Петровын «12 пӱкен» романыштым сайын палымыштым ончыктен да ик пӱкенжын озаже лийын кертыт.

Регион вуйлатыше Александр Евстифеевын ӱжмыж почеш, тенийысе 25-ше гана эртаралтшаш «Бендериадыш» чапланыше шахматист Сергей Карякин толеш.

Икманаш, Юл воктенсе олаште моткоч кугу пайрем лиеш, садлан тудлан ямдылалташ кызытак тӱҥалыныт. Фестивальлан олам кузерак тӱзатат, тидым ончаш кодшо кечылаште Марий Эл вуйлатыше миен коштын. Александр Евстифеев эҥер сер мучко эртен, рӱдӧ площадьыште да тӱшка калыкын жапым эртарыме моло верлам ончен савырнен.

Тиддеч посна регион вуйлатыше Кава йымалсе этнографий, О.Бендер лӱмеш тоштерлаште, тыгак Вӱд йымалне кужу жап кийыктыме тумо пӧртыштӧ (Дом морёного дуба) лийын. Поснак пытартышыже тудым сымыстарен, вет тошто купеч пӧртыштӧ моткоч оҥай экспозицийым чумырымо, чылажат ойыртемалтше пӱртӱс материаллан – вӱд йымалне кужу жап кийыктыме тумылан — пӧлеклалтын. Тоштер оза Владимир Казаковын ойлымыж почеш, Российыште тыгайже –  лач икте, тыште гына.

— Кажне экспонатдам шедеврлан шотлаш лиеш, — тоштерыште зал-влакым ончен коштшыжла палемден Марий Эл вуйлатыше.

«Бендериадылан» корным да оралте-влакым шотыш кондымо, пайрем сценарийым ямдылыме да моло йодышым оргкомитетын заседанийыштыже каҥашеныт. 

 

Марий Элым вуйлатышын организаций да аналитике виктемжын уверже негызеш А.БАЙКОВА ямдылен 

Опубликовать в Одноклассники

Добавить комментарий