Август кыдал марте Йошкар-Олаште 16 уремыште йоча площадкым уэмден шуктышаш улыт. Тыге оласе изи икшыве-влак 16 площадкыште куанен модаш тӱналыт.
Кодшо кечылаште Йошкар-Ола администрацийын муниципал погым виктарыше комитетше йоча площадкыш модаш келыштарыме у оборудованийым шогалташ электрон аукционым увертарен. Аукцион 24 июньышто эртаралтшаш. У оборудований-шамычым 15 август марте палемдыме уремласе площадкылаш вераҥден шуктышаш улыт.
Мэрийын увертарымыж почеш чыла йоча площадкыштат мунчалтен волымо курыкым, лӱҥгалтышым, ошман кумдыкым, карусельым, спорткомплексым келыштарышаш улыт. Тылеч посна у теҥгыл ден урно-шамычым вераҥдылаш тӱҥалыт. Ола бюджет гыч тидлан 5,8 миллион теҥгем ойыреныт.
Р.ЧЕПАКОВА.