УВЕР ЙОГЫН

Сайлымаш кечым пеҥгыдемденыт

6 июньышто Йошкар-Олаште Марий Эл Кугыжаныш Погынын 49-ше сессийже эртен. Тушто 15 йодышым онченыт.

Заседаний тӱҥалтыште депутат-влак «Марий Элын шымше созыв Кугыжаныш Погынышкыжо депутат-влакым сайлымаш нерген» пунчалым приниматленыт. Тудын дене келшышын, тиде сентябрьын кокымшо рушарнянже, 8 сентябрьыште, лиеш манын пунчалыныт.

Тыгак «Марий Эл Республикыште йочан праваже шотышто уполномоченный нерген» у законым приниматленыт. Ынде уполномоченный 5 ийлан палемдалтеш. Тыгодым тиде кугыжаныш должностьым тудо кок срок деч шуко жап айлен огеш керт. Кызыт республикыште тиде пашам вес должностной лица – Марий Эл вуйлатыше пелен Йочан праваже шотышто уполномоченный – шукта.

«О регулировании отдельных отношений в области охоты и сохранения охотничьих ресурсов на территории РМЭ» законыш пуртымо вашталтыш оҥай. Але марте сонарлаш разрешений черет дене келшышын (тудыжо йодмашым пуымо жап дене палемдалтын) пуалтын. А ынде поснак аклалтше янлык-влак шотышто у правил пеҥгыдемдалтын: нуным сонарлаш чыла разрешений гыч пелыжым пайдале сомылым шуктышо сонарзе-влак налын кертыт. А тышкыже икмыняр тӱрлӧ паша пура, мутлан: пирым, рывыжым сонарлымаш, янлык-шамычым пукшымаш, моло. Вес пелыже кодшо сонарзе-влак коклаште жеребьевко йӧн дене ойыралтеш.

Тиде сессийыштак депутат-шамыч коллегышт Владимир Кожановын полномочийжым жап деч ончыч пытареныт. Шкенжын ойлымыж почеш, тудо ЛДПР гыч лектын да Кугыжаныш Погынышто тиде партийын еҥжылан ойыралтше верым айлаш кумылжо уке.

Эртыше сессийыште Марий Элын 10 законжым да Кугыжаныш Погынын 18 пунчалжым приниматленыт, икмыняр республиканский законым федеральный законодательстве дене келшышын шотыш конденыт.

Л.КАМАЛЕТДИНОВА.

Опубликовать в Одноклассники

Добавить комментарий