Эртыше рушарнян, 9 июньышто, Шернурышто Пеледыш пайрем гӱжлен. Сеҥымашлан 20 ий темме лӱмеш паркысе аланыште калык шкежак пеледышла волгалтын.
Пайрем капка ончылно кинде-шинчал, муро дене Марий Элын ялозанлык да кочкыш сату министрже А.Гречихом, Шернур районысо миниципальный образований вуйлатыше Г.Яндуловым, администраций вуйлатыше С.Адигановым, Шернур землячествын (вуйлатыше — Е.Пайдышев) еҥже-влакым да моло унам вашлийыныт. Марий Элын да Шернур кундемын тистыштым районысо ялозанлыкыште тыршыше ветеранже-влак нӧлталыныт.
Шошо ага пашам иктешлен, министр А.Гречихо «Лукоз» каза фермын да Шернур сырзаводын (вуйлатыше — В.Кожанов) ятыр пашаеҥыштлан министерствын Чап грамотшым, Тауштымашыжым, а С.Адиганов ден ялозанлык пӧлкам вуйлатыше Г.Ямбулатов мландым курал-ӱден, шурным ончен куштымаште ойыртемалтше озанлыклаште тыршыше-влаклан тыгак Чап грамотым кучыктеныт. Муро ден куштымаш пӧлекым верысе коллектив-влак веле огыл, тыгак Шернур землячестве лӱм дене саламлаш толшо-влак РФ-ын сулло артистше В.Шапкин Светлана пелашыж дене, Марий Элын сулло артистше-влак А.Бирюков (Марий самырык театр) ден А.Егошина (М.Шкетан лӱмеш Марий национальный драме театр), мурызо С.Гарашкин (Э.Сапаев лӱмеш опер да балет академический театр) ыштеныт.
Пеледыш пайрем ты гана Семык (тудым 12-13 июньышто палемдат) дене ик жапыштырак тольо. Сандене культур пашаеҥ-влак Лопка Семыкын кузерак эртыме дене палдарышт. Теве икымше кечын суртоза ден озавате пӧрткӧргӧ гыч тӱрлӧ осалым шикш дене тӱтырыктен луктыч, пызле воштыр дене вӱдым уна-влак ӱмбакат шыжыктышт — осалыштым мушкын колтышт. Вара нунылан мландыш пугомыля дене пызле укшым перен пурташ темлышт, ӱстел коклашкат ӱжыч. Семык вашеш самоварыштымат, чайникыштымат, кӱмыж-совлаштымат «шияҥденыт». Кокымшо кудышто ӱдыр-каче-влакын модын-воштылын, мыскарам, ӱчым ыштымыштым (пу артанам пошкудо кудывечыш нумалыныт, пӧрт ден монча тӱньыкым петыреныт) ончыктеныт. А кумшо суртышто мурен-куштеныт, унам онченыт, пырля кушталташ темлышт.
Семык деч вара Лышташ кугарня шуэш. Тудым руш-влак Троица (Тройчын) маныт. Тиде йӱламат ончыктышт. Ӱдыр-шамыч лывырге куэ йымаке пеленышт кондымо чесым шынденыт. Пайремын ик тӱҥ кочкышыжо – муно ден пура. Уна-влакым сийлыме деч вара куэ укшыш тасмам кылдыктышт, руш калык модыш дене модыктышт.
А тиде жапыште аланын вес лукыштыжо «Кеҥеж ӱдыр» конкурс эртен. Тушкыжо районысо кандаш ял шотан илемже гыч шымытше гыч ушненыт. Кажныже сылне деч сылне, уста деч уста, но… «Кеҥеж ӱдыр» лӱмым Марисола кундем гыч Валерия Любимова сеҥен налын.
Тиде кечын футбол дене районын чемпионатше, спортын моло видше дене таҥасымаш-влак эртеныт. А кастене чыланат «Шернурышто — пайрем» концертыш ушненыт.
Пеледыш пайремым шке жапыштыже Агавайрем йӱлам алмашташ шонен муыныт. Шернур велне кок пайремжат аралалтеш. Вес ийын ты кундемыште, шочмо верыштыже, Йошкар пеледыш пайрем эшеат кумдан эртаралтшаш, вет тудым палемдаш тӱҥалмылан 100 ий темеш.
Светлана ПЕХМЕТОВА
Авторын да Л.Вершининан фотошт
