7 июньышто Марий Элын шымше созыв Кугыжаныш Погынышкыжо депутат-влакым сайлыме шотышто кампанийлан тӱҥалтыш пуалтын.
Кугарнян эртыше пресс-конференций тидланак пӧлеклалтын ыле. Сайлымаш, тудын эртыме радамже да тенийсе ойыртемже дене республикын ЦИК председательже Ирина Татаринова палдарыш да ушештарыш:
- сайлымаш 8 сентябрьыште лиеш. Ты кечын 125 избирательный кампаний эрта, 1410 депутатым сайлыман;
- Кугыжаныш Погынын депутатшылан кандидат-влакым 8 июнь гыч 7 июль марте темлаш тӱҥалыт. Регистрироватлалтше кандидат-влакын мыняр улмышт нерген раш увер 2 август марте рашемеш;
- Йошкар-Олаште да Медведево поселкышто чылаже 128 избирательный участкыште КОИБ (комплекс обработки избирательных бюллетеней) вераҥдалтеш.
- Тенийсе сайлымаш годым регистраций адрес почеш веле огыл, Марий Эл кумдыкышто чынже дене илыме вер адрес дене келшышынат йӱклаш лиеш. Тыгодым жап деч ончыч йӱклымаш ден открепительный удостоверений-влак огыт лий.
- Тазалык шотышто ойыртемалтше еҥ-влакым 8 сентябрьыште йӱклымӧ верлашке посна транспорт шупшыкташ тӱналеш. Участковый избирательный комиссий-влакын йӱклаш келыштарыме 90 утла процент пӧлемышт икымше пачашыште верланен.
- 14 июнь гыч 11 сентябрь марте Марий Элын Рӱдӧ сайлымаш комиссийыштыже избиратель-шамычлан «шокшо линий» пашам ышташ тӱҥалеш. Тудын номерже тыгай: (8362) 240-220.
- Марий Эл Кугыжаныш Погыныш депутат-влакым сайлымашым эртараш 39 миллионат 695 тӱжем теҥге кучылталтеш. Тиде окса республикысе бюджет гыч ойыралтеш.
- Тений 1 январьлан республикыште 542 371 сайлыше уло.
Любовь КАМАЛЕТДИНОВА.
Авторын фотожо.