Тиде кечынак Марий Эл вуйлатыше Александр Евстифеев экономический вияҥмаш йодышым тарватыше икмыняр площадкын пашашкыже ушнен.
Икымше дискуссийыште Российын субъектлаштыже инвестиций шотышто сӱрет могай улмо шотышто Национальный рейтингын иктешлымашыж дене палдареныт. Тиде паша У проект-влакым илышыш шыҥдарыме стратегический инициативе-влак агентствын полшымыж дене эртен. Площадкын модераторжо Москвасе «Сколково» управлений школын президентше Андрей Шаронов лийын.
«Оласе кумдыкым вияҥдымашке инвестиций» сессийыште еҥ-влаклан илашышт йӧнан условийым ыштышашлан кучем орган ден бизнесын вийыштым иктыш ушаш кӱлмӧ нерген мутланеныт. Тушто ойлымыж годым Россий Федерацийын правительство председательжын алмаштышыже Виталий Мутко палемден: кызытсе жапыште элын элкӧргӧ политикыже йӧнан оласе кумдыкым ышташ виктаралтын да тиде йодыш кугыжаныш кӱкшытыш лектеш. Федеральный правительствын тиде направленийжын пашаже «Илыме вер да оласе кумдык» национальный проектыш пурталтын.
Форумын пленарный заседанийыштыже Россий Президент Владимир Путин ойлен. Тудо национальный проект-влакым илышыш пуртымо, йот элласе партнёр-влак дене вашла пайдале кылым ыштыме, «ужалымаш сарым» чарныме, товарооборотым кугемдыме дене кылдалтше йодыш-влакым нӧлталын. Тудо регион-влаклан национальный проект-шамычым илышыш шыҥдарышашлан частный инвестор-влакым ушаш да кӱкшӧ технологийым вияҥдымаште Российысе компаний-влаклан кугыжанышын партнержо лияш темлен.
Александр Евстифеев форумын кокымшо кечыжым иктешлен да кугыжаныш вуйлатышын выступленийже шотышто тыге каласен:
— Таче – форумын тӱҥ кечыже. Молан манаш гын лийше пленарный заседанийыште Россий Федерацийын Президентше Владимир Путин келге докладым ыштен. Ӱмаштат технологийым вияҥдыме, жаплан келшыше производство-влак нерген ойлалтын. Тачысе докладыштат искусственный интеллект нерген увер шуко ыле. Лишыл жапыште искусственный интеллект вес паша лектышыш, вес экономикыш конда манын палемдалтын.
Санкт-Петербургысо тӱнямбал экономический форум республикын делегацийжылан «Чоҥымо отрасльын реформыжо. Илыме верым чоҥымашын у механизмышкыже куснымаш» панельный сессийыш ушнымо дене мучашлалтын. Тушто РФ-н чоҥымаш да илыме вер-коммунал озанлык министр Владимир Якушев да моло спикер-влак ойленыт.
Л.КАМАЛЕТДИНОВА.
