Санкт-Петербургышто тӱнямбал экономический форумын икымше кечыже лектышан лийын.
Марий Эл вуйлатыше Александр Евстифеевын мутшо почеш, республик гыч мийыше делегаций форумышто пуалтше йӧным моткочак пайдалын кучылташ, ик минутымат арам ышташ огыл манын, шуко площадкыште эртыше мутланымашке ушнаш, экономически пайдале соглашений-влакым подписатлаш тыршен, палдара Марий Элым вуйлатышын организаций да аналитике виктемже.
Икымше кечын лектышыже куандара: кечывал мартеак заседанийыште экономически кушмаш стимул-влак нерген каҥашеныт, 5 соглашенийым подписатленыт.
Республик вуйлатыше «Российысе автомобиль корно-влак» кугыжаныш компанийын секцийжын пашашкыже, «Трансформация в быстро меняющемся виде: государства, компании, люди» пленарный заседанийышке ушнен. Площадкын модераторжо Россий Сбербанк ПАО-н правлений председательже Герман Греф лийын. Тушто Россий Президентын администраций вуйлатышыжын икымше алмаштышыже Сергей Кириенко ойлен.
Икымше кече РФ Кугыжаныш Советын консультативный комиссийжын «Реализация национальных проектов: возможности и устойчивость региональных бюджетов» йодыш шотышто заседаний дене мучашлалтын.
Марий Эл вуйлатышын шонымыж почеш, Петербургысо экономический форум гай кугу федеральный событий-влак регион вуйлатыше-шамычлан икте-весыштым опыт дене палдараш, кугыжаныш вуйлатышын еҥ-влакын илышыштым саемдышашлан шындыме задачыже-влакым кӱлеш семын шукташ у йӧн-влакым муаш полша.
Л.КАМАЛЕТДИНОВА.
