ЭКОЛОГИЙ

Кеҥеж тӱҥалеш веле…

Июнь тӱҥалтыште пӱртӱс шке осал койышыжым Йошкар-Олаште веле огыл, районлаштат сайынак ончыктыш.

Синоптик-влакын онгчылгоч кӱдырчан кугу йӱр, шолем, пеш виян мардеж лийын кертме нерген шижтарымыштат чынеш толын. Мутлан, июньын икымше кечынжак Марий Турек посёлкышто пеш кугу йӱр лийын. Санденак поселкысо корнылаште, сад-пакчалаште эсогыл вӱд ловыкталт шинчен.  Еҥ-влак йолвурго марте тудым тошкал эртен коштыныт. Сад-пакчаште гын вӱд эсогыл лапкарак кушкылым локтыл коден. Шукыштлан ынде чылажат угыч шындаш логалеш, очыни. Эшежым ночкылан кӧра кушкылын вожшо умбакыжат локтылалт кертеш.  

 3 июньышто кугу йӱр дене пырля тӱтан мардеж Йошкар-Олаштат верын- верын озаланен. Ик вере печым, вес вере пушеҥгым йӧрыктен, асфальт гоч вожге лектын пурен кайышат лийыныт. Индешымше микрорайонышто корнышто шогышо пале эсогыл машина ӱмбакат йӧрлын.  

Медведево районыштат шолем озаланен. Сад-пакчасе кушкылым чотак кырен локтылын. Вӱдшӧ ешаралтынак толын.  

Чыла тидым шотыш налын, Россий МЧС-ын Марий Элысе Тӱҥ управленийжын пресс-службыштыжо шижтарат: кӱдырчан йӱр годым тӱтан талышна гын, годым икмыняр правилым шотыш налман:

— телевизор ден моло электроприборым, тыгак мобильный телефоным йӧртыман;

— окнам, тӱньыкым петырыман;

— кертме семын пӧртыштак лияш тыршыман;

— коҥгаш олтыман огыл, молан манаш гын тӱньыкым волгенче перен кертеш;

 — пӧрт воктене шогышо пушеҥге йымаке автомашнам шогалтыман огыл;

 — йоча-влакым шинча ончылнак кучыман;

— тӱтан тендам корнышто кучен гын, лишнырак верланыше оралтыш пураш тыршыман, но пушеҥге, рекламе щит, электропередаче линий, кӱкшӧ обьект-влак пелен шогалман огыл;

 — автомобиль дене кудалыда гын, лучо чарнен шогалаш;

 — мардеж тале гын, тул шотышто тӱткӧ лийман;

Пожарный ден утарыше-влакын телефоныштым ушештарена: – 01, 101 и 112. Россий МЧС-ын респуликысе Тӱн управленийжын «Ӱшан телефонжын» номерже — 69-02-63.

С.Носова ямдылен.

Опубликовать в Одноклассники

Добавить комментарий