Кодшо каныш кечылаште «Чодыра йомак» санаторийыште Марий Элысе журналист-влакын Х юбилей фестивальышт эртыш. Тудым Россий журналист ушемын Марий Элысе пӧлкаже эртарен.
Пытартыш ийлаште тудым «Семейная газета» ден «Пенсионер» газет-влакын редакторышт Оксана Старикова вуйлата. Каласен кодыман, шке жапыштыже лач тудын темлымыж да тыршымыж денак ты фестиваль поро йӱлаш пурен. Ончыч тудо Яльчик ер серысе «Политехник» каныме базыште, «Кичиер» санаторийыште икмыняр гана тудо эртен. А тений журналист-влаклан вашлияш «Чодыра йомак» санторийыште йӧн лийын. Шукерте огыл тудым Сергей Калаев вуйлаташ тӱҥалын. Кӧ санаторийыште эше лийын огыл гын, миен толаш темлена. Чодыра коклаште верланыше ошма пундашан мотор ер, кок кум еҥлан пӧлем-влак, ты кумдыкысо мланде йымал гычак тулымо минеральный вӱд, тӱрло чер деч эмлыше лавыра, оҥай программе — чылажат кумылым нӧлтен. Эшежым игечыжат куандарен. Сандене каналтыме веле огыл, кок кечым пайдалын эртарыме.
Мутат уке, тыгай фестивальым эртараш куштылгыжак огыл. Оксана Старикова да тудын вуйлатыме редакцийыште тыршыше-влакын чолгалыкыштым палемдыманак. Мутлан, тений фестиваль Йоча-влакым аралыме тӱнямбал кечылан пӧлеклалтын ыле. Тудым эше Пионерийын кечыж денат кылденыт. Тиде амал денак журналист-влак шке икшывыштымат пелен намиеныт. Фестиваль почмо годым шуко шочшан участник-влаклан эсогыл ушем лӱм дене пӧлекымат кучыктеныт.
А мо пионерий нерген ушештара? Мутат уке, кум лукан йошкар галстук, горн да барабан. Галстукшым кажне участниклан кучыктеныт гын, горн ден барабанже дене пуалтарен да кырен ончашат йӧн лийын. Фестивальын программыж почеш кидпашалан туныктымо мастер-класс (тудым Ангелина Скворцова ончыктен), ГИБДД пашаеҥ-влак (тудым Медведево районысо ГИББД-н инспекторжо Ирина Хорошавина эртарен), тыгак «Столыпинский вагон» книгам возышо да юмоҥам сӱретлен ыштыше Николай Свистунов дене вашлиймаш-влак эртеныт. Волжск олан ончычсо мэрже дене мутым вашталташ журналист-влаклан оҥай лийын гын, ГИБДД пашаеҥ-влак икшыве-шамычын кумылыштым налыныт. Эшежым йоча-влаклан нуно изирак пӧлекымат кучыктеныт. Редакций-влакын пашаеҥышт да нунын шочшыштын вийышт дене ямдылыме концерт моткоч веселан эртен. Чылаштын кастене тулото воктене гитар почеш мурен шинчымат шарнымашеш кодын. Пионерий жапыш пӧртылмыла чучын.
Фестивальым почмашке Марий Элын тӱвыра, печать да калык-влакын пашашт шотышто министрын алмаштышыже Михаил Матвеев, санаторий директор Сергей Калаев миеныт ыле. Нуно журналист аланыште тыршыше-шамычлан тыгай фестивальым эртарымым, тудын кӱлешлыкшым палемденыт. Чынжымак, ме чыланат увер кумдыкышто пашам ыштена. Но идалыклан ик гана эртаралтше ты фестиваль пырля погынаш, каналташ, икте-весе дене лишкырак палыме лияш, паша опыт дене пайлалташ, тургыжландарыше йодыш-влакым каҥашаш, иктаж-мом уым пален налаш йӧным ышта. Поснак тидыжым районысо газет редакцийын пашаеҥже-влак палемдат. Мутлан, тений Марий Турек районысо «Знамя» газет редакций уло коллективше да икшывышт дене пырля миеныт ыле. Нунак йоча-шамычлан спортивный эстафетым пеш сайын эртарышт.
С.НОСОВА
Снимкылаште: фестивальын шарнымашеш кодшо татше-влак.
Авторын да С.Пехметован фотожо-влак.
