КУЛЬТУР ДА ИСКУССТВО УВЕР ЙОГЫН

«Марий Эл» Италийыш кая

«Марий Эл» кугыжаныш куштышо ансамбль Италийыш гастроль дене икымше гана кая. Кужу корныш тудо 7 июньышто тарвана.

Тушто 10-17 июньышто «Молодая российская культура» фестиваль эрта. Проектыш Российын тӱрлӧ кундемже гыч самырык профессионал коллектив-влак ушнат. Элнан чапшым республикнан лӱмжым нумалше ансамбль аралаш тӱҥалеш.

— Тиде проектыште мастарлыкым ончыкташ — тиде кугу чап, — палемдыш Я.Эшпай лӱмеш Марий кугыжаныш филармонийым жаплан вуйлатыше Эрик Юзыкайн. – Тений «Марий Эл» ансамбльлан – 80 ий. Лӱмгечына вашеш гастрольыш миен коштмына мыланна эшеат кушкаш да вияҥаш вийым пуа. 

Марий артист-влак икмыняр вере мастарлыкым ончыктат. Эн ончычак нуно Италийыште Росийын посольствыштыжо лийыт, тушто 25 минуташ концерт программым темлат. Тӱҥалтыште нуно марий («Тулар ден тулаче», «Ӱдырсий», «Морко сӱан», «Шернур вел куштымаш»), а вара тӱрлӧ калыкын (татар, руш, чуваш) куштымашыже-влакым ончыктат.  

Тиддеч вара «Марий Эл» ансамбль эше ныл олаште: Санта Маринелла, Тольфа, Тарквиния, Лаврин — калыкым куандара.

А декабрьыште ансамбль Германийыш кайышаш.

А.БАЙКОВА

М.Скобелевын фотожо

Опубликовать в Одноклассники

Добавить комментарий