1 июньышто Э.Сапаев лӱмеш опер да балет академический театрыште пӱтынь республиклан йоча симфонический оркестр икымше гана шоктен.
Тиде Тӱвыра, печать да калык-влакын пашашт шотышто министерствын йоча усталык коллективым чумырымо кумшо кугу проектшылан шотлалтеш. Тиддеч ончыч Пӱтынь республиклан йоча хор ден пӱтынь республиклан йоча духовой оркестрым чумырымо.
Йоча симфонический оркестрын концертшым ончаш калык зал тич погынен. Оркестрыш Йошкар-Оласе, тыгак Медведево, Шернур, Морко, Кужэҥер районласе сымыктыш, музыкальный школла гыч эн талантан 100 наре икшывым чумыреныт. Кугу коллективым опер да балет театрын дирижёржо Григорий Нечаев вуйлата да шкежак дирижироватла.
— Уло республиклан йоча симфонический оркестр — тиде сай, оҥай проект. Ончыч йоча-влак оркестрым телевизор дене онченыт але театрыш толмышт годым ужыныт гын, а кызыт нуно шкешт ты коллективыште улыт, опер да балет театрын мэтрже-влак дене пырля ик сценыште шоктат. Икымше репетицийна 25 мартыште лийын. Тыге ме жапын-жапын вашлийынна. Тиддеч посна Йошкар-Оласе школлашке лектын коштынам, тусо икшыве, туныктышо-влак дене посна ямдылалтынна, — палемда Г.Нечаев. — Дирижёрлан профессиональный театрыштат туныктышо семын лияш логалеш. Дирижёр тиде – вуйлатыше, кумылаҥдыше, а кӱлеш годым няньке. Сандене йоча-влак денат кугыеҥ-шамыч дене пашам ыштыме семынак, но икшыве-влаклан тӱткыш утларак кӱлеш. А такшым мемнан республикыште йоча-влак сай музыкальный шинчымашан улыт, струнан, духовой семӱзгарым шоктышо-влак талантан. Пырля пашам ыштыме жапыште нуным молан-гынат туныктенам, мыят нунын деч молан-гынат тунемым, шонем. Оркестр — тиде тӱшка паша.
Концертым оркестр композитор Эрик Сапаевын «Торъял сюитыж» дене почын. Марий шӱлышан произведений, мутат уке, кумылым нӧлтен, шочмо кундемна дене кугешнаш таратен. Тиддеч вара Й.Гайднын, А.Вивальдин, Э.Григын, К.Глюкын, Ж.Бизен, К.Сен-Сансын, Й.Штраусын музыкыштым шоктен. Оркестр посна произведенийым веле огыл колышташ темлен, а органист Арсений Ушковлан, флейтист, РСФСР-ын сулло артистше Виталий Шапкинлан, Э.Сапаев лӱмеш опер да балет академический театрын солистше Любовь Добрыниналан аккомпанироватлен. Концерт чапланыше россий композитор Евгений Крыловын кумдан палыме произведенийже-влак негызеш ямдылыме поппури дене мучашлалтын. Залыште шинчыше-влак кажныжым шокшо кидсовыш дене вашлийын. А тыгодым самырык артист-влакын чурийыштышт куан шижалтын, вет нуно черетан кугу проектым илышыш шыҥдараш вийым, шинчымашым да мастарлыкым пыштеныт!
Оркестрыште Национальный президент искусство школ гыч ятыр икшыве шокта. Нунын коклаште 8-ше классыште тунемше Наташа Михайлова лийын.
— Флейте дене шоктем, пеш келша. Тиде прект мыланна, самырык музыкант-влаклан, опытым погаш, ончыкылыкнам ойырен налаш полша, шонем. Концертыште чылаже 9 произведенийым шоктенна. Тушечын кажне марий еҥ семын мыламат Эрик Сапаевын «Торъял сюитыже» чот келшыш, тиддеч посна Евгений Крылатовын мурыжо-влак негызеш ямдылыме поппури кумылым нӧлта, — ойла морко ӱдыр. — Ончыкыжымат шкемым сымыктыш тӱняште ужам, симфонический оркестрын дирижёржо лийнем. Но тидлан чот тунемман, сандене школ деч вара музыкальный училищыш, а вара иктаж олаште консерваторийыште шинчымашым пойдараш шонем. Мемнан тукымышто илышыштым музык дене кылдыше-влак шукын огытыл, теве ковамын тукым шольыжо марий композитор Виталий Алексеев.Тудын дене ме чыланат кугешнена.
Концерт пытымеке, тӱвыра, печать да калык-влакын пашашт шотышто министр Константин Иванов кажне музыкантлан да туныктышылан Марий Эл вуйлатыше Александр Евстифеевын Туаштымашан серышыжым кучыктен.
Пӱтынь республиклан йоча симфонический оркестр — тиде чынже денак кугу проект. Тудо кушкын толшо тукымлан профессионал театрыште мастарлыкым ончыкташ, у шинчымашым налаш, тӱняумылымашыштым кумдаҥдаш да ончыкылык корным ойырен налаш полша. Сандене лӱдде ойлаш лиеш: «Ончыко, самырык музыкант! Корнет пиалан лийже!»
Алевтина БАЙКОВА
М.Скобелевын фотожо
