Шукерте огыл Марий кугыжаныш университетын аспиранткыже, Марий образований институтышто редакционно-издательский пӧлкам вуйлатыше, тыштак марий филологий да культурологий кафедрыште тыршыше Надежда Гусева И.Н. Ульянов лӱмеш Чуваш кугыжаныш университетыште филологий шанче кандидатлык диссертацийым арален.
Диссертацийын темыже – «Поэтика марийского рассказа о Великой Отечественной войне». Шымлымаш паша Кугу Отечественный сар темылан пӧлеклалтын, марий сылнымутышто 1941 ий гыч тӱҥалын тачысе кече марте возалтше ойлымаш-влакым поэтике могырым тӱрыс шымлен, лончылен лекме.
Науко пашажын вуйлатышыже – филологий науко доктор, профессор Р. Кудрявцева.
«Эше школышто тунеммем годымак Кугу Отечественный сар нерген возымо произведений-влакым йӧратен лудынам. Адакшым сар темылан возымо изи прозым тымарте шымлыме лийын огыл. Садлан, очыни, тиде теме мылам утларак лишыл лийын. Кугу таум каласем Туныктышемлан – Раисия Алексеевналан. Лач тудын гай еҥ пелен кеч-могай сеҥымашышкат шуаш куштылго!» – каласыш Надежда Васильевна.
Г.КОЖЕВНИКОВА.
Снимкыште: филологий шанче кандидат Н. Гусева вуйлатышыже филологий шанче доктор, профессор Р.А. Кудрявцева дене пырля.