Теҥгече Марий Элым да эше 56 регионым цифровой вещанийыш кусарыме.
Тылеч вара тошто телевизоран-влак йӧратыме каналышт ден передачыштым ончен огыт керт – 10 кече гыч аналоговый вещаний йӧршын пыта. Но дисплейыштыже у телевидений дене кылдалтше йодышлан вашмутым муаш полшышо телефон номер уло. Можым-кузежым рашемдаш кӱлеш гын, тушко йыҥгырташ ида ӧр.
Цифровой телевещанийын ик эн сай велже – палынак чапле сӱрет да йӱк. Тылеч посна 20 общероссийский телеканал да кум радиоканал дене чылт яра пайдланаш лиеш.
Тидым шукертак да ик гана веле огыл ушештарыме: телевизор тошто гын, цифровой приставке ден антенным налаш кӱлеш. А вещанийын у видшым кучымыжым рашемдаш неле огыл.
Марий Элыште илыше-влак цифровой приставкым специализироватлыме кевытлаште веле огыл, Россий почтын отделенийлаштыжат налын кертыт. А южо граждан-влаклан: тӱнен илыше шкет еҥлан, шуко шочшан ешлан да монь – цифровой приставкын роскотшым пӧртылтат.
М.ИВАНОВА
