УВЕР ЙОГЫН

Ончыкылык инженер-влаклан – уэмдыме рӱдер

Йочам аралыме тӱнямбал кече вашеш Марий Элым вуйлатыше А.Евстифеев уэмден олмыктымо деч вара Йоча да самырык-влаклан технический усталык рӱдерым торжественно почын.

Ты тунемме вер 1931 ийыштак пашам ышташ тӱҥалын, но шуко жап тудын шке оралтыже лийын огыл, санденак секцийже-шамычым Йошкар-Ола мучко тӱрлӧ кундемыште вераҥдаш логалын. 2017 ийыште гына тудлан пӧлемым ойыреныт. Воспитанник-влаклан тиде кугу куан лийын гынат, тудым уэмден олмыкташ кӱлын. Республикын правительствыштыже тиде йодышым каҥашеныт да объектым капитально ачалаш пунчалым луктыныт. Тидлан федерал ден регионысо бюджетла гыч 4,5 миллион теҥгем ойыреныт. Тыге кӱчык жапыште оралте у сыным налын да кӧргыжат кызытсе жаплан келшыше обрудований дене пойдаралтын.

«Тыгай объект-влак моткоч кӱлешан улыт. Элым вуйлатышын шонымашыже – технический образованийым вияҥдаш. Владимир Владимирович Путин Федеральный Погынжылан посланийыштыже палемден: образований системын негызыштыже тыгай принцип лийшаш: кажне йочан талантше уло, а мемнан задаче – тудым почаш», – каласен Александр Евстифеев.

Тудо рӱдерын моделизм, роботехнике, увер технологий, киностудий кабинетлаштыже, тыгак конференц-залыште да методический пӧлемлаште лийын да уэмдыме пашам сайлан шотлен. А республикысе правительствын членже-влаклан кӱштен: рӱдерыште пашам ышташ вузлаште туныктышо-шамычым да молым кумылаҥдаш, тыгаяк тунемме верым кундемнан моло районыштыжо ышташ.

Марий Эл Республикым вуйлатышын организаций да аналитике виктемжын уверже негызеш Г.Кожевникова ямдылен.

Опубликовать в Одноклассники

Добавить комментарий