Параньга районысо Матародо ялыште илыше Зоя Гребневам кидмастар семын моткоч сайын палат.
Зоя Ивановна мӧҥгыштыжӧ вургемым урга. Шканже веле огыл, а йодын толшо-влакынат кумылыштым огеш кодо.
— Сомыл деч посна шинчымаш уке. Телым курткышто замокым вашталташ, йолашым кӱчыкемдаш але окна занавесым, шторым ургаш кондат, а кеҥеж велеш утларакше марий вургемым ямдылаш йодын толыт, — палемдыш З.Гребнева.
Чолга ӱдырамаш вургемым урга веле огыл, а тудым тӱрлӧ лопкытан, тӱрлӧ тӱсан тасма-влак дене келыштара. Ямдылыме марий вургемжым Параньга районысо чыла гаяк ялыште чият, тыгак Шернур, Кужэҥер, Советский районла гыч тудын полышыжлан ӱшанат. Ургымо вургемжым выставкылашкат чӱчкыдынак ончаш луктыт. Тыгайжым верысе тӱвыра пӧртыштак эртарат.
— Пытартыш жапыште тошто вынер тувыр гыч, тӱрым пӱчкын луктын, габардинкыш келыштарен ургаш йодыт, — ойла Зоя Ивановна. – Мӧҥгыштӧ вольыкым огына кучо, сандене машина воктене шинчаш жап уло. Южгунамже эр гыч кас марте манме гай тыршаш логалеш.
З.Гребнева име, крючок денат пидаш пеш мастар. Йодын толшо-влаклан мыняр джемперым, кугу шовычым, кофтым пидын пуэн – огешат шарне. А пӧлек шотеш кӧлан гына кучыктен огыл?!
— Авам тӱрлаш пеш кертеш ыле. Тудым онченак, мыят тыгай пашалан кумылаҥынам, очыни, — манеш кидмастар.
Зоя Ивановна кидпашаж дене веле огыл калыкым куандара, тудо тӱрлӧ пеледышым ончен куштымыж денат ӧрыктара. Кеҥежым пӧрт ончылныжо, окна йымалныже тӱрлӧ тӱсан пеледыш тамле пушым торашке шара, а телым урем дене эртен кайыше-влак окнасе пеледышыже-влакым куанен ончат. Фиалкыже, гераньже могай гына тӱсан огытыл?! Ончен, шер ок тем.
Жапше годым Зоя Ивановна Йошкар-Оласе учебный комбинатыште кем ургызылан тунем лектын. Сандене кызытат кемым урген, портышкемым тумыштен кертеш.
— Самырык годым школ пачерыште иленна. Тунам школысо чыла гаяк туныктышын портышкемжым тумыштенам. Кызытат уныка-шамычын кемыштым эскерем, кӱлеш годым ургем, тумыштем.
Зоя Ивановна 70 ийыш тошкалын. Йочаж годымак шӱмаҥме пашаже кызытат чонжылан лишыл. Сандене Параньгасе быткомбинатыште, Йошкар-Оласе шубо фабрикыште пашам ыштыме пагытшым жапын-жапын шарналта.
— А «Труженица» фабрикыште сулен налме канышыш лекмеш тыршенам. Варажымат ышташ кумыл лийын, но паша верым шыгыремдылаш тӱҥальыч. Мыланна, латкок ӱдырамашлан, фабрике гыч каяш логале, — ойла З.Гребнева. – Тунам Меведевыште пачерыште иленна. Пааш деч посна шинчаш йӧсӧ лийын, чон ойгырен, шортын.
Икмыняр жап гыч Зоя Ивановна ешыж дене шочмо кундемышкыже пӧртылыныт да аважын сурт олмыштыжо у кермыч пӧртым нӧлтеныт.
— Пелашемлан ола воктене пачерым коден толаш йӧсӧ лиеш шоненам, но ял тудлан пеш келшен. Сандене эреак сурт коклаште тӱрлӧ сомылка дене шогылтеш, а мый калык йодмо почеш пашам ыштем, — ойла кок уныкан кова.
Теве тудо тыгай марий ӱдырамаш: поро кумылан, пашалан тале, чылажымат шот дене ыштыше, ура чонан.
А.БАЙКОВА
Авторын фотожо
