29 май – военный автомобилистын кечыже
Салтак, у тургым толмым шижын,
Пасушко корным такырта.
«Урал-влак», луктын кочо шикшым,
Урлат куатле тракторла.
Эше ал ӱжара эрвелне
Ташлен ыш шукто мландымбак.
Кугу капка гыч корно велке
Автовзводна лектеш пешак
И.Попов.
У Торъял районысо Човыксола ялеш шочын-кушшо армийыште ПАПУ ротышто водитель сомылым шуктышо, кызыт «Ончыко» журналыште тӱҥ редакторлан ыштыше Игорь Попов срочный службо нерген теве кузе шарналта:
– Салтак илыш Свердловск областьысе Верхняя Пышма олаште эртен. ПАПУ (полевые автоматизированные пункты управления) ротышто водитель лийынам. Мыланем келшен. Студент улмем годым ДОСААФ-ыште «С» категориян водительлан тунемынам. Мылам технике моткоч келша. Но контракт почеш кодаш шонымаш нигунам лийын огыл. Мый эрыкым йӧратем. Адакшым тусо илыш деч «темынам». Пеш шуко начальник улыт: взвод командир, рото командирын алмаштышыже, старшина, ротын командирже да тулеч моло. Тыгодым кажныже шке «мурыжым мура».
Учений шарналт кодын. Тудо кок арнят, кум тылзат шуйна. Ончылно задаче шындалтеш, тудым шуктыман. Мутлан, казармыште илыме дене таҥастарымаште ученийыште икте-весым палаш, умылаш, вашла полшаш, нелым сеҥаш тунемат. Лач тунам кӧн могай койышыжо – раш почылтеш. Тыгодым усталык шуаралтеш. Ик учений деч вара весыште писырак, мастаррак лият. Кызыт лӱйкалаш шагал пуат. Калашниковын автоматше дене икымше гана лӱйкалымем годым соҥгыра лийшаш гай чучын. Вара тунемалтын. Тылзылан ик гана оксам пуэныт. Вот тудо кече эн пиалан лийын: мӱгиндым, йогуртым, рулетым налын кочкынна. Верысе кевытыш йышт коштынна. Тудыжо офицер-влаклан келыштаралтын. У ий пайремлан старшинана мыланна ик кугу казан пловым шолтен конден.
Тидыже шкешотан пӧлек семын лийын. Армий иктаж пашам, ончылан шындыме задачым самостоятельно шукташ туныктен. Техникым сайрак пален налынам, опытым погенам, электрощитыштат пургедынам, бензопиламат кӱлеш семын кучылтын моштем. Тиде чылажат илышыште кӱлеш лиеш, шонем. Возымо паша деч каненам. Службеш кодаш темленыт, но погон ден нимогай званий монь мыйым огыт сымыстаре.
Армий деч лӱдаш ок кӱл. Тушко логалыда гын, шукырак пайдам налаш тыршаш кўлеш. Тыгодым патриотизм шӱлыш кажнын шке чонышто лийшаш. Тидыже тукым гыч тукымыш шуйнышаш, тунам элнат пеҥгыде да волгыдо лиеш.
Е.ЭШКИНИНА.
