Тӱнямбалне кажне ийын май мучаште Пошкудын кечыжым палемдат. Тиде поро, оҥай да ойыртемалтше пайрем Российыште тений 31 майыште эрта.
28 майыште Звенигово оласе Калыкым социально обслуживатлыме комплексный рӱдерын «Гармония» клубшын еҥже-влаклан Звенигово йоча книгагудын вӱдышӧ библиотекарьже З.Бутенина «Поро пошкудо-влакын кечышт» палдарыме-модмо мероприятийым эртарен. Клубын участникше-шамыч «XXI курымын пошкудыжо могайрак лийшаш?» йодышлан вашештеныт, кумдан палыме руш писатель А.Пушкинын, А.Чеховын, Н.Гогольын, И.Тургеневын, А.Купринын, М.Салтыков-Щедринын, Д.Мамин-Сибирякын пошкудо дене кылдалтше произведенийже-влакым лончыленыт.
Мероприятийым пошкудо нерген такмак ден мурым мурен мучашленыт.
М.ИВАНОВА
