Марий садовод-влак «О садоводстве, огородничестве и дачном хозяйстве» федеральный законын проектшым чолган каҥашат. Нуно тиде документыш 40 утла вашталтышым пурташ темлымашым ямдыленыт да тидым Кугыжаныш Думын депутатше Виктор Кидяевлан ончыктеныт.
Тыгодым темлымашыштым поддержатлаш йодыныт. Темлыме вашталтышышт сад пашам шуктымаште вашлиялтше нелылык ден чаракым кораҥдаш полшат, тудым вияҥдаш да нӧлталаш законодательный йӧным ыштат манын, нуно ӱшанат.
Мутлан, «Союз садоводов России» ушемын Марий региональный отделенийжын председательже Геннадий Петрушин тыге палемден:
— «Сад пӧрт – тиде мланде йымалсе коммуникацийдыме сооружений» манын законышто каласыме дене йӧршеш огына келше. Пӧрт вӱдым йоктарен колтымо да кабель электроэнергий деч посна лийын кертеш мо? Кузе тидым разработчик-шамыч ужын огытыл? Ынде мыланна каҥашаш да вашталтышым пурташ темлаш перна. Тыгак законын проектыштыже сад товариществылаште тӱшкан пайдаланыме погым формироватлыме источник раш палемдалтын огыл.
«Мир» сад товариществе правленийын председательже Андрей Мухин сад товариществым шуко пачеран пӧрт-влак дене тӧр шындаш темла.
— У законопроект погынымашым сад товариществыште эртарыман манын темла. Мыйын шонымаште, тиде да участке оза-влакын заочный погынымашыштым эртарыме шотышто законын проектшым шотыш кондаш кӱлеш, — палемден тудо.
Виктор Кидяев нине темлымаш-влакым парламентарий-коллегыже-влак ончылно поддержатлаш, мемнан садоводна-влаклан полшаш шонымыж нерген каласен. Тыгак республикыште садовод-влакын шке сад товариществышт шотышто нӧлталме йодыш-влакым рашемдымашке ушнаш сӧрен. А тиде – сад товариществыла деке наҥгайыше корным тӧрлатымаш, чодыра лишне улшо сад товариществылаште пожар лӱдыкшыдымылык дене келшышын эрыктыме пашам шуктышаш ятыр молат. Тидыже ончыкта:республикысе тӱрлӧ ведомство ден организаций-влакын садовод-шамыч дене депутатын йодмыж почеш вашлиймаш-влак ончыкыжымат лийыт да лекше йодыш-влакым тушто рашемдаш тӱҥалыт.
— Мланде пашам ыштыше да шканышт, йочаштлан урожайым куштышо еҥ-влакым мый поснак пагалем. Сандене нунын йодмыштым колшаш да полшышаш улына, — ойла В.Кидяев.
Л.Камалетдинова.
