КУЛЬТУР ДА ИСКУССТВО

Руш ӱдыр марла кушта

Лаштыкнан тачысе унаже – Йошкар-Ола гыч Наталия ден Андрей Дмитриевмыт.

Андрей Йошкар-Олаште шочын-кушкын, а Наталия — Воронеж облатьысе Борисоглебск ола гыч. Кызыт коктынат Я.Эшпай лӱмеш Марий кугыжаныш филармоний пеленысе «Марий Эл» кугыжаныш куштышо ансамбльын солистше улыт, тыгак «Онар» йоча коллективым вуйлатат, икшыве-влакым куштымаш искусствылан шӱмаҥдат. 

Изинекак спортым йӧратыше рвезе молан тӱвырам ойырен налын? Руш ӱдырым Марий Элыш толаш мо кумылаҥден? Нине да моло йодышлан, шкешт дене мутланымеке, вашмутым пален нална.

Наталия, Марий Элыш толмо корнет кужу лийын докан?

— Чын, эн ондак Ворнежысе хореографий училищыште тунемынам. Чылаже кандаш ий мастарлыкым шуаренам. Классический куштымаш пӧлкаште тунемынам, тыгодым театрыште ятыр балетыште куштымо. Но икана олашке Игорь Моисеевын коллективше гастроль дене толын. Йолташ-влак дене тушко миенна да артист-влакын куштымышт моткоч келшен. Тиддеч вара калык куштымаш пӧлкаш тунемаш кусненам. Училищым пытарымеке, Санкт-Петербургышто Касвел военный округын мурышо да куштышо ансамбльжын солистшылан ыштенам. Тушто ик ӱдыр дене палыме лийынам ыле, тудо Казаньысе кугыжаныш ансамбль нерген шуко каласкален. Тыге мый «Казань» коллективыш логалынам да тунамак тусо Культур кугыжаныш институтын хореографий искусство пӧлкашкыже заочно тунемаш пуренам.

Марий рвезе дене кушто палыме лийынат?

— Андрей дене ансамбльыш ушнымеке палыме лийынам. Икмыняр жап келшенна, родо-тукым, йолташ-влакым чумырен, 2015 ийыште сӱаным ыштенна.

Андрей, а Марий Элыш пӧртылаш мо таратен?

— Тудо жаплан вич ий ансамбльыште куштенам. Коллектив кугу, икоян лийын, но чонем шочмо кундемышкемак шупшын, татар тӱвырам огыл, а марий культурым, искусствым кӱшкӧ нӧлтымӧ шуын. Адакшым «Марий Эл» ансамбльышкат кушташ, Палантай лӱмеш культур да сымыктыш колледжышкат туныкташ ӱжыныт ыле. 

Наташа, а тылат Марий Эл, Йошкар-Ола ӧрдыж кундемла чучын огыл?

— Казаньыште тунемме, пашам ыштыме годым Андрей икмыняр гана конден ыле. Йошкар-Ола моторлыкшо, яндарлыкше дене моткоч келшен. Андрейын ача-аважат тӱвыра аланыште пашам ыштат. Нуно мылам марий калыкын тӱвыраже, тудын вияҥмыже нерген шуко каласкаленыт. Сандене пелашем дене пырля толаш келшенам.

«Марий Эл» ансамбльыш толмекет, марий куштымашым кушташ йӧсӧ лийын докан?

— «Казань» ансамбльын репертуарыштыже тӱнямбалсе тӱрлӧ калыкын куштымашыже лийын, «Марий Элынат» – тыгак. Но марий куштымаш, мутат уке, нелын чучын: тывырдыкшак мом шога! Тидлан шуко пӱжвӱдым йоктараш логалын. Икымше куштымаш-влак тыгай лийыныт: «Юл воктене», «Кельмаксола вел йыр куштымаш». Кум ий жапыште марий тӱвыран, йӱлан ойыртемже дене сайынак палыме лийын шуктенам. Ындыжым чылажат – лишыл, шерге.

Ача-ават шочмо кундемет деч торашке кайымет шотышто мом каласеныт?

— Тӱҥалтыште ойгыреныт, но мый ӧрдыж еҥ дене каен омыл, нуно пелашемым сайын паленыт, тудлан ӱшаненыт. А кызыт мемнан пашанам ончен куанат.

Нуно Марий Элыште лийыныт мо?

— Эше уке, но шкенан коллективын сценыште выступатлымыжым видео дене ончыктенам, нунылан пеш келшен.

Ансамбльыште куштеда да тыгодымак йоча-шамычым тидлан шӱмаҥдеда…

Н.:- Туныктымо паша – шкешотан, оҥай. Йоча-влакын шинча йӱлен, пӱжалт-пӱжалт тыршымыштым ужмеке, кумыл нӧлтеш, а кунам ыштыме пашан лектышыжым ужат – тугеже арам огыл, шоналтет. Мутлан, ӱмаште «Михаил Мурашко йолташыже-влакым ӱжеш» конкурсышто «Онар» ансамбль «Марий куштымаш» номинацийыште икымше степенян лауреат лийын.

А.: — тыгак мый Палантай лӱмеш тӱвыра да сымыктыш колледжыште «Хореографий искусство» пӧлкаште туныктем. Толшаш ийын нуно тунем лектыт, шукышт умбакыжат илышыштым куштымаш дене кылдаш шонат. А тидыже, мутат уке, мыйым веле огыл куандара.

Вате-марийлан ик паша верыште лияш сай але уке?

— Кӧ сай огыл манеш гын, тиде йоҥылыш, шонем. Эн тӱҥжӧ илышыште икте-весым умылыман, пагалыман, йӧратыман пелашым да йӧратыман шке пашам. Тыгай годым еш пиаллан нигӧ мешаен огеш керт.

Алевтина Байкова мутланен

Фотом еш альбомышт гыч налме

Опубликовать в Одноклассники

Добавить комментарий