УВЕР ЙОГЫН

Россий министерстве кӱкшын аклен

20 майыште республикын правительстве пӧртыштыжӧ Марий Эл правительстве ден Инвалид-влакын III Всероссийский кеҥежымсе спартакиадыштын финальный таҥасымашыже-влаклан ямдылалтме да нуным эртарыме  шотышто  оргкомитетын пырля эртарыме заседанийышт  лийын. Тушто  Россий  спорт министрын алмаштышыже Марина Томилова  участвоватлен.

Марий Элыште тиде кугу   мероприятийым эртарыме марте кок тылзе наре жап кодеш. Заседанийым почмыж годым республикым вуйлатыше тыге палемден: Марий Элын  правительствыже кундемыште спортым вияҥдыме  пашалан кугу тўткышым ойыра, республикылан ты шотышто уло мо дене кугешнаш.

Инвалид-влакын шушаш спартакиадышт нерген ойлышыжла, Александр Евстифеев тыге рашемден каласен: финальный таҥасымашлан ямдылалтме паша тӱҥ мероприятий-влакым эртарыме план дене келшышын  шукталтеш. Республикын правительствыже таҥасымашым эртараш палемдыме объект-влакым ямдылыме йодышым эреак шинча ончылно куча. Спортсмен ден уна-влаклан йолын да транспорт дене лӱдыкшӧ деч посна кошташышт чыла йӧным ыштыме. Нуно лӱмын ойырымо автобусла дене кудалышташ тӱҥалыт. Тыгак электротранспорт дене оксам тӱлыде пайдаланен кертыт. Спортсмен ден уна-влаклан лӱмын ямдылыме врач ден волонтер-влак полшаш тӱҥалыт. Таҥасымашым эртарыме  кечылаште  Спартакиадын участникше-влаклан культурный ден экскурсионный оҥай мероприятийлам  эртараш палемдалтеш. Спартакиадым торжественно почаш да петыраш  ямдылалтына. Таҥасымаш келшымаш, спорт пайреш шўлышеш эртыже манын, республикым вуйлатыше ден Марий Эл калык чылажымат ыштат, ўшандарен каласен Александр Евстифеев.

  Россий  спорт министрын алмаштышыже Марина Томилова Марий Элыште Инвалид-влакын спартакиадыштым эртараш кӱлеш семын ямдылалтме манын палемден.

Инвалид-влакын III Всероссийский кеҥежымсе спартакиадыштлан ямдылалтме пашан кузе шукталтмыж нерген республикын молодежный политике, спорт да туризм министрже Лидия Битюкова каласкален. Тудо тыге ушештарен: таҥасымашым эртарыме положенийыш вашталтышым пуртымылан кєра Спартакиадыш Россий Федерацийын субъектлаж гыч  ондак палемдыме семын 3,5 тӱжем  олмеш 2 тӱжем  спортсмен толеш. Таҥасымашым эртараш 360 волонтер полша. Республикыш чылаже 2,5 тӱжем еҥ толшаш.

Заседанийым иктешлыме годым Россий  спорт министрын алмаштышыже Марина Томилова Российысе инвалид-влакын спартакиадышт «Спорт – илыш нормо»  федеральный  проектын  ойыраш лийдыме пеш кӱлешан ужашыжлан шотлалтеш манын палемден да кугу таҥасымашлан сайын ямдылалтмылан Марий Элым вуйлатыше Александр Евстифеевлан таум каласен.

Ушештарена: Марий Эл Республикыште Инвалид-влакын III Всероссийский кеҥежымсе спартакиадыштын финальный таҥасымашыже-влак 2019 ий 12 гыч 20 июль  марте эртат.

 

  Марий Эл Республикым  вуйлатышын организаций да аналитике виктемжын  уверже негызеш П.Шакиров ямдылен 

Опубликовать в Одноклассники

Добавить комментарий