Инвалид-влакын III всероссийский кеҥеж спартакиадышт (12-21 июль) эртыме годым Йошкар-Олаште кастене концертым ончыкташ тӱҥалыт. Таҥасымашын участникше ден уна-влак оласе тӱшка транспорт дене яра кудалыштын да тӱрлӧ экскурсийыш лектын кертыт.
Кеҥеж спартакиадыш таче кечылан элнан 41 регионжо гыч 1360 еҥ деч йодмаш (тудыжым 17 июнь марте пуаш лиеш) пурен.
Кызыт Йошкар-Олаште спортсмен-влаклан таҥасышаш спорт объектлам, илаш, кочкаш верлам ямдылат.
– Спорт объект-шамычым шотыш налын, таҥасымаш-влакым эртараш кок верым палемденна: иктыже «А» – «Дружба» стадион кумдык, весыже «Б» – вӱд спорт полат территорий. Воктенак илыме да кочмо верлам ойырена. Икымшыштыже 1560 еҥым вераҥдарена гын, кокымшыштыжо – 440 еҥым. Тыштыжат, туштыжат 12 муниципал образованийын полшымыж дене концертым ончыкташ тӱҥалыт. Туштак тӱрлӧ сувенирым налаш йн лиеш, – палемден молодёжный политике, спорт да туризм министр Л.Батюкова
Е.Эшкинина.
