Йошкар-Оласе технологический колледжын тунемшыже-влак Санкт Петербургышто эртыше парикмахер искусство, нейл дизайн да декоративный косметике дене тӱнямбал чемпионатыш («Невские берега» Келшымаш Кубок) миеныт. Республикнан чапшым Татьяна Кашкова (3-шо курс) ден Анастасия Стенейкина (3-шо курс) араленыт.Ӱдыр-влак тӱрлӧ номинацийыште таҥасеныт, ойыртемалтше прическым ыштеныт.
— Тений январьыште «Модный образ» оласе конкурсышто усталыкем ончыктенам. Тушто мый икымше верым налынам. Тунам жюриште тӱнямбалне моторлык конкурслам эртарыше Яна Масловат лийын. Тудак мылам наградым кучыктен да Санкт-Петербургысо конкурсыш ӱжмашым пуэн. Каяш але уке манын ятыр жап шоненам. Вара туныктышо Елена Дождикован кумылаҥдымыж дене содыки конкурсышто вием тергаш келшенам, — манеш Анастасия.
Ӱдыр тылзе наре ямдылалтын. Тудо усталыкшым «Постижерный паша, руш калык сувенир теме» номинацийыште ончыктен да IV степенян диплом дене палемдалтын. Каласыман, тиде номинацийыште 50 ӱдыр-рвезе лийын.
— Туныктышем дене ятыр жап шонкаленна, варажым самовар сынан прическым ышташ пунчалынна. Самоварым искусственный ӱп гыч «шочыктенна», лач каркасшылан вес материалым кучылтынна. Прическо чапле лектын. Жюри пашам сайын аклен. Поснак туныктышем-влаклан, колледжын директоржо Анатолий Витальевич Ванюшинлан кугу полышым пуымыштан
таум каласымем шуэш. Тыгак модель Наталья Сарафанниковалан таум ойлем. Тудлан прическым ышташ шагат утла шинчашыже логалын. Тидым чылан чытен огыт керт. Подиумыштат Наталья моткоч моторын койын. Сандене тыгай кӱкшытыш шумаштем тудынат надырже уло, — каласыш ӱдыр.
Снимкыште: А.Стенейкина ден Н.Сарафанникова.
