ГАЛЕРЕЙ ЛӰМГЕЧЕ

«Тудо тыглай калык нерген возен»

2019 ий 22 майыште Марий АССР калык писатель, Кугу Отечественный  сарын ветеранже Аркадий Крупняковын шочмыжлан 100 ий темын. Писательын эргыже, Сергей Аркадьевич, лӱмын, Севастополь ола  гыч Марий Элыш толын.   Тиде кечылаште тудо ачажын шочмыжлан 100 ий теммылан  пӧлеклалтше ятыр вашлиймашым Т.Евсеев лӱмеш национальный ден Йошкар Олан историй тоштерлаштыже, С.Чавайн библиотекыште эртарен. Рӱдоласе Чавайн бульварыште  Аркадий Крупняковын памятник воктенже Марий Эл правительстве председательын  алмаштышыже С.Воронцов, тӱвыра, печать да калык-влакын пашашт шотышто министрын алмаштышыже Г.Ширяева, С.Крупняков да творческий интеллигенций писательым порын шарналтеныт да пеледыш аршашым пыштеныт. Вара делегаций  Советский посёлкыш  да тудын шочмо кундемышкыже, Чкарино селаш, миен. Писательым шарныме кечым  Советский посёлкысо  рӱдӧ площадьыште  Г.Ширяева почын. А школышто тунемше-шамыч «А.Крупняковын произведенийжым лудына» конкурсышто мастарлыкыштым ончыктеныт.  Кечывал деч вара Советский районысо книгагудышто А.Крупняковлан шарнымаш оҥам почыныт. Каласыман, рӱдӧ библиотекылан тудын лӱмжым 1995 ийыште пуымо. Тыгак посёлкышто «Аркадий Крупняков – Акпарс мландын мурызыжо»  литератур сынан кас эртен. Туште лудмо конкурсым иктешленыт. А кастене Н.Семенов лӱмеш скверыште «Он жил, чтобы оставить след» кином  ончыктеныт.

  Вара Сергей Аркадьевич да уна-влак Чкариныш каеныт. Тушто селасе калык,  поэт А.Сагирова,  туныктышо, верысе тунемше, уна-влак писательын тойымо верышкыже миеныт, порын шарналтен, пеледышым пыштеныт. Писательшочмо селаж гыч армийыш 1939 ийыште каен, вара Кугу Отечественный  сарыште лийын, мӧҥгӧ 1946 ийыште веле пӧртылын. Чкаринысе библиотеке-тоштерыште  А.Крупняковлан пӧлеклалтше «Русский писатель марийской земли» электрон презентацийым ончыктеныт.

   – Аркадий Степановичын  «У моря Русского», «Марш Акпарса», «Царев город», «Лада»,  «Амазонки», «Гусляры » произведенийлажым  калык уло кумылын лудын.  Тудо шкеже пеш проста лийын. Тыглай калык нерген возен. Таче ачамын  шуко шонымашыже шукталте. Тудын «Марш Акпарса»  исторический романже почеш кином сниматлаш сценарий ямде. Киножо,  шонем, шуко сериян лийшаш, – палдарыш Сергей Аркадьевич Крупняков.

М.СКОБЕЛЕВ.

Авторын фотожо.

Снимкылаште:А.Крупняковын Сергей эргыже шарнымаш оҥам почмо годым. Шӱгарыште. С.Крупняков ачажын шарнымаш кечыжым почеш.

Опубликовать в Одноклассники

Добавить комментарий